08 Ақпан, 2019 NEWS
Азат Перуашев: Қазақ жылқысына тек соғым деп қарамау керек
Азат Перуашев Қостанай өңіріне сапары аясында «Қазақ тұлпары» жылқы зауытына барып, серіктестік басшылығымен кездесті
Парламент Мәжілісінің депутаты, «Ақ жол» партиясының төрағасы Азат Перуашев Қостанай өңіріне сапары аясында «Қазақ тұлпары» жылқы зауытына барып, серіктестік басшылығымен кездесті, деп жазады Qamshy.kz ақпарат агенттігі.
«Қазақ тұлпары» ЖШС-ның директоры Диас Қоңыршин атқарылған жұмыстар жөнінде айтып, алдағы жоспарларымен бөлісті. Оның айтуынша, кәсіпорын Қостанай тұқымын дамытып, әрі қарай жетілдіру үшін инвесторлар тапқан екен, енді Ауыл шаруашылығы министрлігі ақшалай қаражат бөлу жолдарын қарастыруда.
«Қазақ тұлпары» ЖШС жұмысымен танысқан Азат Перуашевқа мекеме басшысы бірқатар мәселелер мен кедергілер туралы айтты.
– Бұған дейін барлық жағдай жасалып келген еді. Қаржылай көмек те көрсетілген. Өкінішке орай, оның барлығы тоқтады. Неге? Ол жағына тоқталғым келмейді. Ауыл шаруашылық саласында дұрыс жұмыс жасалмаған. Бірақ, әлеует бар бізде. Қазіргі уақытта бағдарлама бойынша 3 асыл тұқымды жылқыны сатып алмақпыз, – деді мекеме басшысы.
Мәжіліс депутаты өз кезегінде қазақ жылқысына тек соғым ретінде ғана қарамау керектігін тілге тиек етті.
— Қостанай жылқысы жойылу алдында тұр. Небәры 20 млн теңгеге асыл тұқымды жылқыларды қалай өсіруге болады? «Қазақ тұлпары» – біздің бренд. Өзге елдерде осы бағытта жұмыс істейтін білдей бір министрліктер бар. Бізде қостанай жылқысын сақтап қалумен айналысып отырған сіздер ғана, – деді Перуашев.
Ұсынған: Назерке Лабихан
Қате тапсаңыз, қажетті бөлікті таңдап ctrl+enter басыңыз.
Пікір қалдыру
пікір