Қытайлық инвесторлар корбид зауытын салмақ

Қай мемлекеттің өркендеу жолында болмасын инвестицияның алар орны ерек болған. Қаржының құйылуы бұл  ел экономикасын алға жылжытып ғана қоймай,  келешегіңе де кемелді жол салады. Соңғы онжылдықта Жамбыл облысы да инвестицияның игілігін барынша көруде. 

Ал енді  қытайлық  инвесторлар өңірден  корбид өндіретін зауыт салуға ниет танытуда.  Бұл  жайында  облыс әкімі Асқар Мырзахметовтың  инвестор «North Huajin Chemical Industries Incorporated» компаниясы мен «Тараз химиялық паркі» АЭА-ның өкілдерімен болған кездесуінде айтылды. Кездесуде «Химпарк Тараз» АЭА аумағында аммиак және карбамид өндіретін жобаның жүзеге асырылу барысы талқыланды.

Айта кету керек, «North Huajin Chemical Industries Incorporated» компаниясы мұнай, газ,химиялық өнімдер өндірумен айналысатын әлемдегі 500 ірі ұйымның қатарына кіреді. Химикат пен тыңайтқыш өндіру саласында 40 жылдан астам тәжірибесі бар ұйым өңірімізде  корбид өңдіретін зауыт салуға ниетті. Бұл бағытта олар инвестиция құйып, құны 600 миллион АҚШ доллары болатын жобаны жүзеге асырмақ. Зауыт жылына 800 мың тонна өнім өндіреді деп күтілуде. 2021-2022 жылдары жүргізілетін құрылыс жұмыстарына 4 мыңға жуық жұмысшы тартылып, зауыт іске қосылғанда 400-500 адам тұрақты жұмыспен қамтылады деп күтілуде.

Кездесуде аталмыш Қытай компаниясының  вице-президенті Канг Кифа өз сөзінде жобаның мақсаты мен маңыздылығы жайлы айтып өтіп, инфрақұрылым мәселелерін тілге тиек етті. Әсіресе, газ, электр, және жол мәселелерін шешу бойынша жеңілдіктер сұрады. Бұл аталған үш негізгі фактор басты назарда. Зауыт салу ісі оң қарқынға ие болады деп күтілуде. Ерекше жоспарланып отырған аталмыш зауыт өз даму қарқынынан түспейтініне сенім мол.

Өз сөзінде  өңір басшысы инфрақұрылым мәселелері осы бағыттағы инвесторларға қатысты тиісті заңға сәйкес шешімін табатынын жеткізіп, аталмыш жобаны облыста жүзеге асырудын тиімді тұстарына тоқталды. Сонымен  қатар игі бастама екенін айрықша айтты.

Сондай-ақ, Асқар Исабекұлы мүмкіндігінше қажетті жағдайлар жасалынатын айта келе, инвесторларға да қойылатын нақты талаптар бар екенін баса айтты. Облыс әкімі жоба бойынша ашылатын жұмыс орындарына негізінен жергілікті  тұрғындарды тарту керектігіне аса көңіл аудартты. Бұл бағытта сұранысқа орай мемлекеттік грант бөліп, қажетті мамандарды дайындауды қазірден қолға алуға болатынын айтып, нақты ұсыныстарын жеткізді.

Жайдар Азамат