• USD 378.65
  • EUR 430.07
  • RUB 6
  • CNY 55.1
18 Қыркүйек, 01:59:49
Ауыл шаруашылығы министрлігінің назарына! «Жем шөптің бағасы күйіп тұр, қамшыңа жазшы», – дейді әкем

19 Тамыз, 2019 Аймақтар

Жамбылда екі жылда елді мекендер толықтай газбен қамтылады

Ауылдың ажарын ашу мемлекеттік саясаттың ұстанған басым бағыттарының бірі. Әсіре шалғайдағы жұрттың шаруасын шалқыту үшін «Ауыл – ел бесігі» жобасының тигізіп жатқан шарапаты мол. Мәселен Жамбыл облысы Т.Рысқұлов ауданында мемлекеттік бағдарлама аясында көгілдір отын тарту жұмыстары тірлігін тіктеп табуда деп жазады Qamshy.kz ақпарат агенттігі. 

Жалпы аталған аудан бойынша 1990 жылдары газ құбыры тартылған төрт елді мекен-Құлан, Ақыртөбе, Көгершін, Көкдөнен ауылдары болса, 2012 жылға дейін газ кіргізілген Жақсылық және Абай ауылдық округінің Еңбекші, Көкарық ауылдары да қосылып отыр.

2012 жылдан бері газ құбыры 18 елді мекенге- Малдыбай, Құмарық, Қарақат, Тереңөзек, Көкарық, Өрнек, Луговой, Жарлысу, Р.Сәбденов, Әбжапар, Сәлімбай, Қаракемер, Алғабас,Қайыңды, Мамайқайыңды, Қызыл шаруа, Сөгеті ауылдарына газ құбыры пайдалануға берілді. Газдандырылған елді мекендер саны- 24, бұл аудан елді мекендерінің 56,0 пайызы.

Газ құбыры тартылмаған елді мекендердің жалпы саны-19, оның ішінде газ кірмеген 12 елді мекен: Жаңатұрмыс, Каменка, Қазақ, Жалпақсаз, Тасшолақ, Қорағаты, Бәйтелі, Д.Қонаев, Әбілхайыр, Қорағаты стансасы, Шөңгер, Шолаққайыңды ауылдары. Қалған 7 елді мекен газдандырылу ықтималдығы төмен аз қоныстанған және шалғай орналасқан елді мекендер санатына жатады: Аққайнар, Тойқұдық, Мамыртөбе, Қосапан, Сұмқайты, Құмарық разъезі, Разъезд-98.

Жалпы аудан елді мекендерінде 12672 аула болса, оның 40257 адам және 9624 аула немесе 62,4 пайызы газбен қамтылған. Газ құбыры тартылмаған 6 ауылға Д.Қонаев, Әбілхайыр, Бәйтелі, Қорағаты, Шөңгер, Шолаққайыңды ауылдарына 2019 жылы газ тарту жұмыстарын жүргізуге жобалық сметалық құжаттама (ЖСҚ) дайындау үшін жергілікті бюджеттен 15,0 миллион теңге қаражат бөлінді. Бүгінгі таңда мемлекеттік конкурс процесі жүргізілуде.

Газ құбыры тартылмаған елді мекендерге 2019-2020 жылы газ тартуға ЖСҚ дайындалып, бюджеттік өтінім беріліп, 2020-2021 жылдары елді мекендер газ құбырымен толық қамту мақсатында қаражат сұратылуда.

Көгілдір отынға көпшілік қол жеткізсе, бұл бұқара үшін үлкен олжа болары даусыз. Себебі бірер жылдан бері газ құбырлары жүргізіліп жатқан Шу ауданының тұрғындарының өзі әлі толықтай газдың рақатын көре алмай отыр. Ал Мойынқұм сынды шалғай ауылдар тіпті келер онжылдықтың жоспарына енді енді. Сондықтан Т.Рысқұлов ауданы тұрғындарының бөркін аспанға атып, қуануға толық құқығы бар. Өйткені бұл өлке 2020-2021 жылдары толықтай көгілдір отынның қызығын көргелі отыр.

Ел үшін жасалған игі бастама деген осы шығар, сірә...

Қате тапсаңыз, қажетті бөлікті таңдап ctrl+enter басыңыз.

Баннер

Пікір қалдыру

пікір