Шетелдік сарапшы: Головкин әлі де соққысы қуатты боксшы, бірақ...

Шетелдік сарапшы Головкиннің алдағы чемпиондық жекпе-жегінің маңызды тұсын атады деп жазады Qamshy.kz ақпарат агенттігі Vesti.kz сайтына сілтеме  жасап.

Showtime телеарнасының редакторы Стефен Эспиноза тілшіге берген сұхбатында қазақстандық Геннадий Головкиннің (39-1-1, 35 КО) украиналық Сергей Деревянченкомен (13-1, 10 КО) жекпе-жегінің маңызын атады.

Боксшылар 5 қазанда Нью-Йорктегі Madison Square Garden аренасында жұдырықтасады. Бұл жекпе-жекте орта салмақта IBF титулы сарапқа салынады.

"Головкин әлі де соққысы қуатты боксшы, бірақ, 37 жаста аяқтары қалай қимылдайды? Бұл үлкен мәселе. Бұрынғыдай жылдам ба? Роллспен жекпе-жек бұл сұрақтарға жауап бермеді. Деревянченко - басқа деңгейдегі қарсылас. Бұл жігіт элитаға жақын. Ол жылдам әрі шыдамды бола алады. Головкинде қиындықтар туу мүмкін. Осы жекпе-жектен кейін біз GGG жоғары деңгейде жұдырықтасуға дайын ба деген сауалға жауап аламыз деген ойдамын", - дейді Эспиноза.

Айта кетейік, боксшылар көзарбасу рәсімін өткізген болатын. Деревянченко баспасөз мәслихатында "Головкиннің дәуірі өтіп барады" деген еді, ал қазақстандық қарсыласының күштілігін мойындап, нағыз шоу боларына уәде берді.