• USD 389.52
  • EUR 429.21
  • RUB 6.07
  • CNY 54.94
15 Қараша, 04:01:34
Қазақстан Украинаның сауда нарығына алаңдаулы

06 Қараша, 2019 Саясат

Ақтөбеде Жанболат Мамайдың жақтастарына "қысым жасалғаны" хабарланды

Белсенді Жанболат Мамай құрайын деп отырған демократиялық партияның бастамашыл топ өкілдері Ақтөбедегі жақтастарына "қысым жасалғанын" хабарлады. Бұған дейін Мамай бастаған бастамашыл топ өкілдері Қазақстанның батыс өңірін аралап, партияға адам жинайтынын хабарлаған, бірақ Мамайдың өзі "пробациялық бақылау қызметінің тыйымына" байланысты бұл сапардан қалып қалған деп жазады Qamshy.kz ақпарат агенттігі Азаттықтың дерегін негізге алып. 

Бастамашыл топ мүшесі Инга Иманбайдың айтуынша, 5 қарашада Ақтөбедегі кездесу қарсаңында облыс әкімдігі жергілікті белсенді Бақыт Жаншаеваға "қысым жасаған". Мұны Бақыт Жаншаеваның өзі де растап отыр.

- Ақтөбе облысы әкімінің орынбасары Марат Тоғжанов пен облыстық ішкі саясат басқармасының басшысы Бұлбұл Елеусінова әкімдікке шақырып алып, үш сағаттай ұстады. Азаматтық позициям мен белсенділігіме қатысты сауалдар қойды. Мамайдың партиясы туралы сұрады. "Осындай істердің басы-қасында үнемі жүресіз. Оның бәрі досьеңізге жазылады, бала-шағыңыз бар" деп ескертті, - дейді Бақыт Жаншаева.

Инга Иманбай "осыдан бір күн бұрын Орал қаласында болып, партия құру үшін мың адамнан қол жинадық. Жақтастарымыздың көбейгенін көрген билік алаңдай бастады" дейді.

Ал Ақтөбе облысы әкімінің орынбасары Марат Тоғжановтың сөзінше, Бақыт Жаншаева әкімдікке өзі басқаратын "Үш таған" журналының шаруасымен барған.

- Басқа айтарым жоқ, мен ешкімге қысым жасаған емеспін, - деді Марат Тоғжанов.

Ақтөбе облыстық ішкі саясат басқармасының басшысы Бұлбұл Елеусінова да "белсендіге қысым жасалды" деген тұжырымды жоққа шығарып отыр.

- Бақыт Жаншаеваның азаматтық позициясы мен қоғамдық белсенділігіне әкімдік кіріскен емес. Ол өз шаруасы. Біз онымен "Үш таған" журналына жазылу барысы, қаржыландыру мәселесі туралы ғана сөйлестік, - деді Бұлбұл Елеусінова.

Бірнеше апта бұрын белсенді Жанболат Мамай Қазақстанда жаңа оппозициялық партия құратынын мәлімдеп, бастамашыл топ құрылғанын хабарлаған. Екі жыл бұрын шартты жазамен босатылған белсенді өткен апта соңында пробация қызметінің тыйымына байланысты Алматы қаласы аумағынан шыға алмай отырғанын да айтқан.

Бұрын тәуелсіз "Трибуна" газетін басқарған журналист, қоғам белсендісі Жанболат Мамай "Мұхтар Әблязовтан қаржы алды" деп айыпталып, шартты жазамен босатылған. Сот оған үш жыл журналистік қызметпен айналысуға тыйым салған. Жанболат Мамай өзіне тағылған айыпты мойындамаған.

Қате тапсаңыз, қажетті бөлікті таңдап ctrl+enter басыңыз.

Баннер

Пікір қалдыру

пікір