42 500 теңгеге алуға өтініш қалдыратын жаңа сервис іске қосылды

Қазақстанда төтенше жағдайға байланысты мемлекеттік әлеуметтік сақтандыру қорынан берілетін әлеуметтік төлемге өтініш беруге арналған қосымша сервис іске қосылды. 

Сервис Enbek.kz электрондық еңбек биржасының алаңында құрылды. МӘСҚ-тан ең төменгі жалақы – 42 500 теңге мөлшерінде төлемге өтініш беру үшін келесі қадамдарды орындау қажет:

1. 42500.enbek.kz сайтына кіріңіз;
2. «жәрдемақы алу 42 500» таңдаңыз;
3. өтініш берушінің аты-жөні, ЖСН, IBAN немесе жұмыс берушінің БСН, электронды поштасы көрсетілген нысанды (форма) толтырыңыз;
4. нысанды (форма) жіберу керек;
5. жүйе телефон нөмірін сұрайды;
6. телефон нөмірін SMS арқылы жіберілген кодпен растау;
7. өтініш жіберілді.

Өтінішті өңдеп, «Азаматтарға арналған үкімет» мемлекеттік корпорациясы» КЕАҚ деректерін тексергеннен кейін, өтініш беруші қабылданған шешім туралы SMS-хабарлама алады, ақпарат төлемді тағайындау және төлеу үшін МӘСҚ-қа жіберіледі.

Естеріңізге сала кетейік, төтенше жағдайлар кезінде табысынан айырылу жағдайына байланысты МӘСҚ-тан әлеуметтік төлем келесі санаттағы азаматтарға тағайындалады:

• орта, шағын және микробизнес субъектілерінің қызметкерлері;
• жеке кәсіпкерлер (бұдан әрі – ЖК);
• жеке практикамен айналысатын адамдар (нотариус, жеке сот орындаушысы, адвокат, кәсіби медиатор) (бұдан әрі – ЖП);
• бірыңғай жиынтық төлемді төлеушілер;
• нысанасы жұмыстарды орындау (қызметтер көрсету) болып табылатын азаматтық-құқықтық сипаттағы шарттар (бұдан әрі – АҚС) бойынша табыс табатын, салық агенттері олар үшін міндетті зейнетақы жарналарын аударған адамдар;
• карантин енгізілген елді мекендердегі ірі бизнес субъектілерінің қызметкерлері.

Өтінімдерді қарастырудың және әлеуметтік төлемдерді тағайындаудың жалпы мерзімі – 3 жұмыс күні.

Егер сіз бейресми жұмыс істеген болсаңыз, 42500 тг. әлеуметтік төлемақыны ЭЦҚ-сыз алуға болады деген сілтемеге басып, өтініш қалдырып көріңіз.