Алматыда 26 мың жаңа жұмыс орнын құру жоспарлануда

Алматы Жұмыспен қамтудың жол картасы аясында 2045 тұрақты жұмыс орны құрылады. Бұл туралы Алматыда жұмыспен қамтуды қамтамасыз ету мәселелері бойынша онлайн-брифингте қалалық әл-ауқат басқарма басшысының орынбасары Данияр Әлкебайұлы айтты.

– Президентіміздің тапсырмасын орындау мақсатында Үкімет қаулысымен «Жұмыспен қамту жол картасы» қабылданғаны белгілі. Бүгінде Алматы қаласында Жұмыспен қамту жол картасы аясында 214 инфрақұрылымдық жобаны іске асыру жоспарланып отыр. Қазіргі таңда конкурстың процедуралар жүріп жатыр. Оның ішінде келесі жұмыс түрлері мен нысандар бойынша, яғни, әлеуметтік-мәдени объектілерді күрделі және ағымдағы жөндеу, қайта жаңарту; тұрғын-үй коммуналдық- шаруашылық объектілерін күрделі, орташа және ағымдағы жөндеу, қайта жаңарту; инженерлік көлік инфрақұрылымын күрделі, орташа және ағымдағы жөндеу және қайта жаңарту, сондай-ақ, елді мекендерді абаттандыру сияқты жобаларға жолданатын болады – деді Д. Әлкебайұлы.

 

Спикердің айтуынша, инфрақұрылымдық жобаларды іске асыру аясында жұмыссыз жастар үшін басымдықты Жұмыспен қамту орталықтары арқылы жалдамалы жұмысшылардың кемінде 50%-ы болатын 26 мың жаңа жұмыс орындарын құру жоспарлануда. Жұмыспен қамтудың жол картасы аяқталғаннан кейін жаңа нысандар салу арқылы 2045 тұрақты жұмыс орны құрылады.

Жұмыспен қамтудың жол картасын жүзеге асыру нәтижесінде 47 жаңа нысан, оның ішінде 31 әлеуметтік нысан салынады.

Спикер сондай-ақ, өтініш беру үшін Жұмыспен қамту орталығының сайты жұмыс істейтінін, онда қабылданған шаралар туралы толық ақпарат бар екенін, өтініш беруге арналған сілтеме де көрсетілгенін айтып өтті.

Жол картасы аясында жұмысқа орналасуды жәрдемдесу үшін 6408 адамнан түйіндеме қабылданған. Оның ішінде 708 адам – құрылыс алаңдарында жұмыс істеуге өтініш берген.

 

Барлығы 12 жоба тіркелді, 468 жұмыс орны ашылды, тіркелген жұмыссыздардың ішінде 38 адам жұмысқа орналастырылды.