25 Мамыр, 2020 NEWS

Б. Сағынтаев: Оқушының жетістігі – ұстаздың абыройы, еңбегінің нәтижесі

pinterest.ru

Алматы қаласының әкімі Бақытжан Сағынтаев мектеп түлектерін соңғы қоңыраумен құттықтады. Бұл туралы Facebook парақшасында жазды.

– Бүгін мектеп түлектері үшін ең маңызды күн. Алматыда 9299 мектеп түлегі үлкен өмірге қанат қақты. Соның ішінде 545 түлек – «Алтын белгі» иегері, 714 оқушы оқу озаты атанды. Биыл мектептерде соңғы қоңырау алғаш рет онлайн түрде соғылды. Мектеп директорлары мен ұстаздар бұл күннің сән-салтанатын келістіріп, сезіндіру үшін қолдан келгенді жасады. Қыруар еңбек атқарылды, – деді Б Сағынтаев.

Сондай-ақ ол төртінші тоқсанда сабақтар қашықтан өткенін айтып, оқу процесінің үзілмеуі үшін жедел іске кіріскендерін атап өтті.

– Құрметті ұстаздар, оқушылар және олардың ата-аналары! Біз қиын сәтті бірлесе еңсере білдік. Тәжірибе жинақтадық. Бұл – болашақтағы заман сынағына лайықты төтеп беруімізге қажет тәжірибе. Биылғы түлектер мектепті онлайн тәмамдаған пионерлер болды. Қолайсыз жағдайда да білімге ерекше құштарлық таныттыңыздар. Балаларға қолдау көрсеткен ата-аналарға мың алғыс. Өз міндеттерін мүлтіксіз атқарған мұғалімдерге рахмет, – деп айтты шаһар басшысы.

Сөз соңында барша түлектерді соңғы қоңыраумен құттықтап, ақ жол тіледі.

– Құрметті түлектер! Өмірлеріңіздің жаңа парағын ашқалы тұрсыздар. Білім көкжиегін кеңейтуге мүмкіндік көп. Қай мамандықты таңдасаңыз да, сол мамандықтың білгір маманы болып шығуға тырысыңыздар. Табандылық – арман мен мақсатыңа апарар алғашқы қадамың. Оқушының жетістігі – ұстаздың абыройы, еңбегінің нәтижесі. Ақ жол!, – деді Б. Сағынтаев.

Қате тапсаңыз, қажетті бөлікті таңдап ctrl+enter басыңыз.

Баннер

Пікір қалдыру

пікір