21 Шілде, 2020 NEWS

«Сауат ашу» пәнінің орнына «Әліппе» оқытылатын болады

ortalyq.kz

Білім және ғылым министрі Асхат Аймағамбетов мемлекеттік жалпыға міндетті стандартқа өзгерістер енгізілгенін хабарлап, «Әліппе» мен «Ана тілі» оқулықтары қайтарылатынын айтты. Бұл туралы ол Facebook парақшасында жазды.
 
– Жақында Мемлекеттік жалпыға міндетті стандартқа өзгерістер енгізіліп, Әділет министрлігінде тіркеуден өтті. Ондағы маңызды жаңалықтардың бірі – келесі оқу жылында бірінші сынып оқушылары «Сауат ашу» пәнінің орнына «Әліппе» мен «Ана тілін» оқитын болады. Бірінші сынып оқушылары оқу жылының бастапқы екі тоқсанында «Әліппенің» бағдарламасын оқыса, қалған екі тоқсанда «Ана тілі» пәнін оқиды. Сәйкесінше, орыс тілінде немесе басқа тілдерде білім алатын сыныптарда «Букварь» мен «Обучение грамоте» пәндері жүргізіледі, – деді министр.
 
Оның айтуынша «Әліппе» Ахмет Байтұрсынұлының әдістемесі негізінде дайындалады.
 
– Қазіргі кезде оқулықтарды әзірлеу бойынша үлкен жұмыс жүргізіліп жатыр. Бірыңғай бағдарлама жасаумен айналысатын жұмыс тобын құрдық. Оның құрамында мықты тіл мамандары, әдіскерлер, бастауыш сынып мұғалімдері мен бұған дейін оқытылған «Әліппе» оқулықтарының авторлары бар. Орынбасарым Шолпан Каринова осы жұмыс тобының алғашқы отырысын өткізіп те үлгерді. Бағдарламалар мен оқулықтар дайын болғаннан кейін оларды пилоттық мектептерде сынақтан өткіземіз деп жоспарлап отырмыз. Кейін басқа мектептерге жіберілетін болады. Бұл мәселе менің жіті бақылауымда, – деп жазды Асхат Аймағамбетов желідегі парақшасында.
 
Еске сала кетейік, бұрынғы білім және ғылым министрі болған Ерлан Сағадиев білім жүйесіне біраз өзгерістер енгізген болатын. Ол бастауыш сыныптан "Әліппе" мен "Ана тілі" оқулықтарын алып тастап, оның орнына "Сауат ашу" пәнін енгізген. 2015 жыл білім жүйесіне енгізілген пән бүгінге дейін қолданыста болды.

Қате тапсаңыз, қажетті бөлікті таңдап ctrl+enter басыңыз.

Баннер

Пікір қалдыру

пікір