Тоқаев Назарбаев еңбек жолын бастаған кәсіпорын жұмысымен танысты

Қасым-Жомарт Тоқаев "АрселорМиттал Теміртау" АҚ металлургия комбинатындағы мырышпен және алюминиймен қаптау цехының жұмысымен танысты. Бұл туралы akorda.kz хабарлады. 

Цех мырышпен қапталған орамды және табақша өнімдерін өндіреді. Оның жалпы өндірістік қуаты жылына 700 мың тонна өнім шығаруға жетеді.

– Бұл қазақстандық металлургиядағы көшбасшы кәсіпорын. Мұнда Қазақстанның тұңғыш президенті Нұрсұлтан Әбішұлы Назарбаев өзінің еңбек жолын бастаған. Біз өндіріс қуатын арттыруды мақсат етіп отырмыз. Маған жаңа инвестициялық жобалар, өндірісті жаңғырту, әлеуметтік жағдайды жақсарту жайында баяндады. Кәсіпорынның алдында тұрған міндеттер аз емес. Сондықтан оны ретіне қарай шешу керек. Ол жайында бұған дейін премьер-министрмен сөйлестім. Жаңа облыс әкімімен де бірқатар мәселені талқыладық. Барлық мәселені ақырындап шешу қажет, – деді Тоқаев.

"АрселорМиттал Теміртау" АҚ бас директоры Наир Биджу президентке кәсіпорынды одан ары дамыту перспективасы, жаңа кокс батареясы құрылысының жоспары, экологиялық қалдықтарды азайту жөнінде қабылданып жатқан шаралар жайында мәлімет берді.

Мемлекет басшысы цехтың дайын өнімдері мен жұмыс жүктемесін қарап көрді. Мырышпен қапталған табақшаларға конструкциялық материалдар өндірісі мен құрылыста сұраныс жоғары. Металлургия өндірісіндегі бұл өнімнің қосымша құны қымбат.