Дариға Назарбаева мәжіліс сайлауына қатысатын болды

"Nur Otan" партиясы алдағы мәжіліс сайлауын ұсынылған кандидаттардың партиялық тізімін жариялады.

"Кандидаттардың жалпы тізімінде парламент мәжілісінің қызметтегі депутаттары 20%-тен аспайды, мемлекеттік басқару саласының өкілдері – 13%, білім және денсаулық сақтау саласы – 12%, үкіметтік емес ұйымдар – 9% және өнеркәсіп – 8%.

Тізімнің үштен бір бөлігі әйелдер. Кандидаттардың орташа жасы алдыңғы партиялық тізіммен салыстырғанда 4 жылға төмендеп, 48 жасты құрады" делінген партияның facebook-тегі жазбасында.

Партия таратқан хабарламада тізім 126 кандидаттан тұратыны, 77 кандидат партияішілік праймериз қорытындысы, ал 49 адам орталық партиялық квота бойынша анықталғаны айтылған.

Олардың ішінде Қазақстан премьер-министрі Асқар Мамин, Nur Otan партиясы төрағасының бірінші орынбасары Бауыржан Байбек, Нұрсұлтан Назарбаев қорының директоры Дариға Назарбаева, мәжіліс төрағасы Нұрлан Нығматулин, президент әкімшілігінің басшысы Ерлан Қошанов, президенттің көмекшісі – президент әкімшілігінің өтініштерді қарауды бақылау бөлімінің меңгерушісі Тамара Дүйсенова, вице-премьер Ералы Тоғжанов, "Самұрық-Қазына "ұлттық әл-ауқат қоры" АҚ басқарма төрағасы Ахметжан Есімов және басқалар бар.