БЖЗҚ зейнетақы төлемдеріне қатысты ақпаратты жариялады

Бірыңғай жинақтаушы зейнетақы қоры қазақстандықтар 2021 жылдың 1 қаңтарында қанша ақша жинағанын жариялады.

Қор баспасөз қызметінің ақпаратынша, 2021 жылдың 1 қаңтарында қор салымшыларының шоттарында 12,9 триллион теңге жиналған. Жыл бойы, яғни 01.01.2020 жылдан бастап 01.01.2021 жылға дейін сома 2,1 трлн теңгеге (20%) көбейген.

Зейнетақы жинақтарының негізгі сомасы:

• Міндетті зейнетақы жарналары (МЗЖ) есебінен – 12,6 трлн теңге (2020 жылдың басынан бергі өсім – 19%);
• Міндетті кәсіптік зейнетақы жарналары (МКЗЖ) есебінен – 315,3 млрд теңге (өсім 28%);
• Ерікті зейнетақы жарналары (ЕЗЖ) есебінен – 2,2 млрд теңге (өсім 12%).

"2020 жылдың басынан бері салымшылардың шоттарына жалпы көлемі 1,1 трлн теңге зейнетақы жарналары аударылды, ол 2019 жылғы көрсеткіштен 94,8 млрд теңгеге немесе 10% асып түсті. Жарналардың жалпы көлемінің 95,6 пайызын БЖЗҚ-ға МЗЖ бойынша аударылған 1,04 трлн теңге мөлшеріндегі түсімдер (өсім 10%) құрайды. 46,9 млрд теңгенің аударымы МКЗЖ бойынша (өсім 8%) жасалса, 539 миллион теңге ЕЗЖ бойынша (өсім 51%) аударылған" делінген ресми сайт таратқан хабарламада.