"Қобалжу жоқ". Бекшин “Sputnik V” вакцинасын салдырды

Алматыда коронавирусқа қарсы ерікті вакциналау науқаны басталды. Алғашқылардың бірі болып қаланың бас санитар дәрігері Жандарбек Бекшин ресейлік "Sputnik V" вакцинасын салдырды.

Бас санитар дәрігер әуелі дәрігердің тексеруінен өтті. Алдын-ала оның дене қызуын, қан қысымын өлшеп, онкологиялық аурулардың бар-жоғы анықтады.

– Бірінші рет вакцина салдырып тұрған жоқпын. Сапасы дәлелденген. Ресейде 2 миллионнан астам адам осы вакцинаны салдырды. Мұның өзі вакцинаның сапалы екенін көрсетіп тұр. Сондықтан ешқандай қобалжу жоқ, вакцинаның сапалы, жақсы екеніне толық сенімдімін, – деді Бекшин.

Сондай-ақ, қала әкімінің орынбасары Ержан Бабақұмаров, қоғамдық денсаулық сақтау басқармасының бастығы Нариман Табынбаевқа да екпе салынды.

– Вакцинация – бұл пандемиямен күрестегі шешуші қадам. Бүгін мен оның маңыздылығын, қауіпсіздігін көрсету үшін вакцинаны қабылдадым. Жақында өзіміздің отандық вакцина егуге дайын болады. Біз ғалымдарға сенеміз. Сондықтан мен қала тұрғындарына – барлығына осы қадамды жасауға кеңес беремін. Вакциналау жүріп жатқан кезде біз маска тағуды, әлеуметтік арақашықтықты сақтауды жалғастыруымыз және вируспен күресудің басқа шараларын қолдануға тиіспіз, – деді Е. Бабақұмаров.

Еске сала кетейік, президент Қасым-Жомарт Тоқаевтың тапсырмасы бойынша бүгіннен бастап Қазақстанда коронавирусқа қарсы "Sputnik V" вакцинасын ерікті түрде салу басталды.