"88 адам көз жұмған". Екі аптадағы жол апатының саны белгілі болды

Қазақстанда соңғы екі аптада жол апатынан 88 адам қаза тапты. Бұл туралы ішкі істер министрлігінің ресми өкілі Нұрділдә Ораз мәлімдеді.  

Министрлік өкілі жол-көлік оқиғасынан қайтыс болғандардың арасында 8 кәмелетке толмаған бала барын айтты.  

– Еңбек демалысы кезеңі келісімен автокөлік қозғалысының жиілігі өсіп отыр. Соның әсерінен көліктен келетін қауіп-қатер артты. Кейінгі 2 аптада 428 жол-көлік оқиғасы кезінде 88 адам көз жұмып, тағы 505 адам жарақат алды. Оның ішінде 92 көлік апатында кәмелет жасына толмаған 8 бала қайтыс болып, 102-сі зардап шекті. Қайтыс болғандар мен зардап шеккендердің үштен бірі жаяу жүргіншілер ,– деді Нұрділдә Ораз.

Оның айтуынша, жүргізушілер мен жаяу жүргіншілердің жол ережесін сақтамауы жол апаттарының негізгі себебі болып отыр 

– Қала сыртындағы жолдарда болатын апаттардың кісі өлімі көрсеткіші жоғары. Жүргізушілер жылдамдық режимін сақтамай және қарсы бағытпен жүруі себеп. Ал елді-мекен аумақтарын жаяу жүргінші жолағын кесіп және жылдамдықты арттыру дерегі жиі тіркеледі, – деді Н. Ораз.