Жүргізуші куәлігін алу талаптары күшейгелі куәлік сатушылардың жұмысы тұралап қалған

 

– Барлық мамандандырылған ХҚКО-лар жаңғыртылуда. Теориялық емтихан тапсыру кезінде арнайы биометриялық жүйе енгізілді. Ол енгізілген сәттен бастап Қазақстан бойынша жүргізуші куәлігін алғандар саны орта есеппен 58%-ға төмендеді. Былтыр бірінші тоқсанда 36 мың адам жүргізуші куәлігін алса, биыл – 15,2 мың адам. "Сондай-ақ автодромдардағы жабдықтар жаңартылады. Енді кішігірім апат болған жағдайда да, автомобиль қажетті элемент дұрыс жасалды ма, жоқ па, көрсетеді. Себебі олар GPS технологиясы арқылы жұмыс істейді. Қазіргі уақытта 14 мамандандырылған ХҚКО-да автодромдар жаңғыртылды. Әрине, жүргізуші куәліктерін беру рәсімдерін күшейтуге бағытталған барлық шаралар кезектерге әкеп соқты, оны Шымкент қаласында болған жағдайдан көрдік. Егер бұрын курсанттардың 50%-ы жүргізуші куәлігін сәтті тапсырса, қазір бесінші реттен кейін ғана тапсыра бастайды. Кезек қалыптасады, мамандандырылған ХҚКО-ларға түсетін жүктеме артады. Инфрақұрылымды арттыруымыз керек, – деді ол.

 

Сүйеніш Әбділдин инфрақұрылымды күшейту мақсатында Түркістанда, Түркістан облысында, Жаңаөзенде және Арқалықта автодромдар ашу үшін жедел жұмыс жүргізіліп жатқанын жеткізді.

 

Сондай-ақ ол ІІМ-мен бірлесіп, автомектептердің жауапкершілігін күшейту және сынақ емтихандарын енгізу бойынша мәселелер пысықталып жатқанын атап өтті.

 

Биометриялық жүйе енгізілуімен жүргізуші куәлігін сатып алу рисктері азайған. Бұл – куәлік сатушылардың жұмысын қиындатады. Жаңа жүйе енгізілгенге дейін қара нарық арқылы куәлік сатып алу категорияға қарай шамамен 50 мың мен 100 мың теңгеге бір-екі күнде шешілетін әңгіме болса, қазір қара нарықтағы куәлік бағасы 200 мың теңгенің о жақ, бұ жағында екені, куәлік алу мерзімі кейде бірнеше аптаға, айға созылып жататыны туралы ақпарат бар.