"Қазақ хандығына 550 жыл" шығармашылық бәйгесіне Арғы жылдар арғымақтың жалында, Құс ұйқымен түн қатып, Жауға дүбір тыңдатып, Терлігі аттың уланып, Қоныстанып ну барып, Тоғыз қабат торқалы, Рух сіңген туды алып, Жауға шапқан ел едік. Арғы жылдар қара нардың беліне, Керегені қом қылып, Туырлықты шом қылып, Қылдан бұйда естіріп, Тобылғы мұрындық жондырып, Ақ самайлы әжені, Нар үстіне қондырып, Сапарымызды оң бұрып, Жайлауға көшкен ел едік. Арғы жылдар сірікті тауда қой бағып, Қой күйісімен ойланып, Сегіз өрім қамшы алып, Жоталы жоннан аң шалып, Жортуылдап жон кезіп, Бөрі соғып қаншалық, Қанжығамыз қан сасып, Аюдан ішік жамылып, Момындығынан жаңылып, Көрмеген қоңыр ел едік. Арғы жылдар арқан тіліп талыстан, Шалма тастап алыстан, Өрмесі сегіз таспалы, Сескендіретін басқаны, Ер астына арқан сап, Тақымнан серке лақтырып, Серілікпен таң аттырып, Бетегелі белдерге, Бес түлігін бақтырып, Еркін өскн ел едік. Арғы жылдар аталы сөзге дес беріп, Алқалы топты ескеріп, Самайын шалған ақ қырау, Сақалды қарттан сескеніп, Қоңыр көңілі қоздаған, Дала тілінде боздаған, Қобыздың үні тым ізгі, Сананың сырын сапырып, Сарнаған сазды сыбызғы, Сағым жылдарды еске алып, Сапырып ішкен қымызды, Салиқалы ел едік. Бергі жылдар бері қайтты көшіміз, Жоталы жонда жосып із, Біріміз сәл-пәл қиналып, Біріміз нұрлы бұйда алып, Саяси ұлы көшке еріп, Бәріміз соны қош көріп, Алтайда бірің алаңдап, Арғы тауда балаң қап, Сенімін жүктеп арқаға, Тарих теңін теңдеген, Көш келді Сарыарқаға, Қош келдің ұлы мереке, Тарқама шаттық тарқама...

Дүргінбайұлы Қызырбек – 1990 жылы дүниеге келген. Шығыс Қазақстан мемлекеттік университетінің Филология факультетінің түлегі. Қазір Өскемен қаласындағы О.Бөкей атындағы қалалық кітапхана қызметкері.