Kásipkerlerge jeńildikpen nesıe beriledi

/uploads/thumbnail/20170708221609062_small.jpg

«Atameken»Ulttyq kásipkerler palatasynyń basqarma tóraǵasy shaǵyn bıznesti qoldaýdyń jańa baǵdarlamasyn túsindirdi, - dep habarlaıdy «Qamshy» portaly palatanyń baspasóz qyzmetine silteme jasap.

«Atameken» QR Ulttyq kásipkerler palatasy shaǵyn kásipkerlikti shaǵyn nesıeleý baǵdarlamasyn iske qospaq. Qaıtarylmaly negizde 1 mlrd. 200 mln. teńge kólemindegi baǵdarlamany qarjylandyrý «ALMEKS» kompanıalar tobynyń jeke kapıtalyn tartý arqyly iske asady. Búgin Palata basqarmasy tóraǵasy Abylaı Myrzahmetov pen «ALMEKS» basqarma tóraǵasy Májıt Esenbaev ózara yntymaqtastyq týraly memorandýmǵa qol qoıyp, shaǵyn nesıeleý sharttaryn aıtyp berdi.

«Byltyrdan bastap Kásipkerlerdi qoldaý ortalyqtary arqyly biz tegin bıznesti servıstik qoldaýdy iske asyryp kelemiz. Endi oǵan qosa shaǵyn nesıeler túrinde qarjylyq demeý kórsetetin bolamyz. «ALMEKS» kompanıalar toby bizdiń ıdeıamyzǵa birinshi bolyp qoldaý kórsetti. Olarǵa bul úshin úlken rızashylyǵymyzdy bildiremiz», – dedi Myrzahmetov memorandýmǵa qol qoıǵannan soń ótken baspasóz konferensıasynda.

Baǵdarlama aıasynda 4 pılottyq oblysqa 300 mln.teńgeden bólinetin bolady, oǵan qosa ákimdikter osy soma mólsherinde qosymsha qarjylandyrmaq. Shaǵyn nesıeler 6-7% paıyzben 3 jylǵa beriledi. «Jobaǵa úlken qyzyǵýshylyq tanytqan Aqtóbe, Qyzylorda, Mańǵystaý jáne Almaty oblystarynda qazir daıyndyq jumystary ótýde. Jaqynda ǵana Jambyl oblysy basshylyǵynan da usynys kelip tústi», – dep habarlady Myrzahmetov.

Palata basqarmasy tóraǵasynyń aıtýynsha, is júzinde nesıe adamgershilik kepiline súıenip beriledi. «Adam «sýdyń da suraýy bar» ekenin túsinýi kerek. Op-ońaı ala salyp, jumsap, odan keıin kelip: «Aqshany toıǵa nemese basqa da jeke basymnyń maqsattaryna jumsap edim» degen bolmaý kerek. Iaǵnı, biz kepil retinde, mysal úshin quny 100 myń teńge bolatyn saban úıdi alyp, 3 mln.teńgelik nesıeni berýge daıynbyz. Bul taza adamgershilikke qurylýy kerek, ıaǵnı adam qolyndaǵy jalǵyz saban úıin berip, oǵan alǵan qarjyny tıisinshe jumsaýy kerek. Kepil quny nesıe mólsherin jabatyndaı bolýy kerek degen talap qoıyp otyrǵan joqpyz»,–dep málimdedi ol.

Myrzahmetov shaǵyn nesıeni alýdyń basty sharty – bul aıqyndalǵan bıznes-jospar ekenin aıtty. «Buǵan qosa biz aýyl sharýashylyǵyna jaramdy 100 tıptik joba jasap shyǵardyq. Olar qazirgi kúni Kásipkerlerdi qoldaý ortalyǵynda jatyr»,–dep qosty ol.

Baǵdarlamaǵa qatysýshylardy bekitetin Óńirlik keńeste kepilgerlik elementi bar. «Olardyń barlyǵy da aýdannan shyqqandar. Sol úshin eń bastysy – qoldaý kórsetý. Iaǵnı biz iz júzinde  nesıeni qaıtarǵansha oǵan kómek kórsetetin bolamyz. Barlyq másele osynda, aýyl turǵynyn jalǵyz tastamaýymyz qajet. Qaıtarylmaly kepil degenimiz osy. Biz onyń aqshasynynń qaıda ketkenin, egin mólsherin, bárin-bárin baqylap otyrmaqpyz. Óńirlik keńestermen sóılestik, sebebi onda iri bıznes bar. Olar ózderine júktelgen jaýapkershilikti túsinip otyr. Mysaly, Mańǵystaýdyń jergilikti kásipkerleri shaǵyn nesıeniń qaıtarylmaýynyń aýa-raıy sekildi oryndy sebepteri bolǵan jaǵdaıda, ony ózderi tóleýge daıyn. Biz munyń tıisti baǵasyn beretin bolamyz»,–dedi Palata basqarma basshysy.

Onymen qosa, Myrzahmetov bıyl ár aýdanda Agrarlyq quzyret ortalyǵy ashylatynyn jetkizdi. «Biz oǵan mamandardy tartamyz. Olar jylyjaıdy salý, tehnıkanyń túrin tańdaý jáne t.b. máselelerde kómektesetin bolady»,–dedi ol.

«Biz nesıe tarıhy boıynsha eshqandaı shekteý qoımaımyz. Qolynda bıznesi bolyp, ony úlkeıtkisi keletinder de, jańadan bastaýshylar da qarjylyq kómek ala alady», – dedi Palata Basqarma basshysy.

«ALMEKS» Basqarma tóraǵasy Májıt Esenbaev óz kezeginde Elbasynyń tapsyrmasy boıynsha qurylǵan shaǵyn nesıe berý uıymdary búgingi teńgelik ótimdilikke baılanysty úlken qıyndyqtarǵa tap bolǵan. «Olar usynyp otyrǵan, shamamen 45-50%-ǵa teń paıyzdar, menińshe, shaǵyn jáne orta bıznes úshin múldem tıimsiz.  Oǵan qaraǵanda búginde 14%-ben nesıe beretin «Damý mıkro» uıymy qyzmeti jaman emes. Biz olarmen básekege túskimiz kelmeıdi. Kerisinshe, shaǵyn nesıe mólsherin ulǵaıtý arqyly kómek kórsetkimiz keledi», – dedi ol.

«ALMEKS» mundaı táýekelge barýdan seskenbeı me degen suraqqa basqarma tóraǵasy: «Táýekelke bel býmasqa bolmas. Biz buǵan sanaly túrde keldik, sebebi nátıjesi biz úshin jaqsy bolmaq. Biz keleshekte qolaıly qarjylyq jáne ınvestısıalyq orta qalyptastyrýǵa qabileti bar nátıjeli bıznesmender jasap shyǵatynyna senemiz .Táýekelge barý sebebimiz de osy». 

 

 

 

 

Pikir qaldyrý

Qatysty Maqalalar