Qazaqstanda tamaq jetkizý qyzmetine qatysty jańa talaptar bekitildi. Kýrerler densaýlyǵy týraly anyqtama alý úshin medısınalyq tekserýden, gıgıenalyq daıyndyqtan ótýge mindetteldi.  

Bıyl 1 qańtardan bastap Qazaqstanda tamaq jetkizý qyzmetine qatysty jańa talaptar bekitildi. Standartqa sáıkes, kýrerlerde medısınalyq tekserýden ótkeni týraly belgisi bar belgilengen úlgidegi jeke medısınalyq kitapsha bolýy kerek. Sondaı-aq olar kásibı gıgıenalyq daıyndyqtan ótýge jáne jalpy qabyldanǵan normalar men minez-qulyq erejelerin basshylyqqa alýǵa tıis.

“Osy standartty qoldanýdan qoǵamdyq tamaqtandyrý ónimderin jetkizý naryǵyndaǵy talaptardyń ashyqtyǵy men birizdiligi qamtamasyz etiledi, tutynýshylardyń kórsetiletin qyzmetterge degen senim deńgeıi artady jáne Qazaqstanda azyq-túlik qaýipsizdigi júıesiniń nyǵaıýyna yqpal etedi", – dep málimdedi saýda jáne ıntegrasıa mınıstrliginiń tehnıkalyq retteý jáne metrologıa komıteti.

Budan bólek, qoǵamdyq tamaqtaný ónimderin tutynýshylarǵa jetkizý kezinde jáne tapsyrystardy berý pýnkterinde qaptamany tasymaldaý barysynda syrtqy zaqymdanýyn anyqtaý úshin tapsyrystaǵy ónimdi tekserý múmkindigi berilýi kerek.

Qabyldanǵan standart meıramhanalardyń, dámhanalardyń, logıstıkalyq kompanıalardyń jáne kýrerlerdiń tamaq jetkizý qyzmetiniń sapasyn arttyrmaq.