قىتايدىڭ شاڭدۇڭ ايماعى «EXPO Astana 2017» كورمەسىنە قاتىسادى

/uploads/thumbnail/20170808151140844_small.jpg

قىتايدىڭ شاڭدۇڭ ايماعى «EXPO Astana 2017» كورمەسىنە قاتىساتىن بولدى. بۇل ءوڭىر قىتايدىڭ شىعىسىندا ورنالاسقان وندىرىستىك، ءارى اسا دامىعان تۋريستىك-شيپاجاي ايماقتىڭ ءبىرى، دەپ جازادى Qamshy.kz اقپارات اگەنتتىگى قازاقپاراتقا سىلتەمە جاساپ.

جۇڭگو تارابى بۇگىندە قازاقستانمەن ەكىجاقتى ەكونوميكالىق جانە ساۋدا ىنتىماقتاستىعىن ءوربىتىپ، وعان قوسا، ىسكەرلىك كەلىسسوزدى جانداندىرىپ، مادەني قارىم-قاتىناستاردى ارتتىرۋدى كوزدەپ وتىر. اسىرەسە، شاڭدۇڭ ايماعىنىڭ ۇلى دالا ەلىمەن بايلانىستى تەرەڭدەتپەك نيەتى ەرەكشە. بۇل تۋرالى ازيا مەملەكەتتەرى اقپارات قۇرالدارى وكىلدەرى ءۇشىن شاڭدۇڭ ايماعى ۇيىمداستىرعان ارنايى مەديا ساپار كەزىندە جاريا ەتىلدى. وعان قازاقستان، وزبەكستان، مالايزيا، تايلاند، شري-لانكا ەلدەرىنىڭ جۋرناليستەرى قاتىستى.     

«EXPO Astana 2017» كورمەسىندەگى شاڭدۇڭ ايماعىنىڭ اپتالىعى ءۇش بولىمنەن تۇرادى: ايماقتىڭ ەكونوميكاسىن تانىستىرۋ، كورمەنى ۇيىمداستىرۋ جانە ءبىرىنشى تۇلعالاردىڭ ءسوز الىسى. اپتا اياسىندا استانا مەن الماتىدا 10 ءىرىلى-ۇساقتى ىسكەرلىك-مادەني شارا وتكىزۋ جوسپارلانىپ وتىر.  

شاڭدۇڭ ايماعىنىڭ استاناعا ساپارى الدىندا ازيالىق ب ا ق وكىلدەرىنە ايماقتىڭ الەۋمەتتىك-ەكونوميكالىق الەۋەتى جان-جاقتى تانىستىرىلدى. جەرگىلىكتى اكىمشىلىك مەديا ساپار كەزىندە جۋرناليستەرگە شاڭدۇڭ ايماعىنىڭ كەلەشەگى زور ونەركاسىپ ورىندارىن كورسەتتى. ناقتى ايتقاندا، جينان، دۇڭياڭ جانە يانتاي قالالارىنداعى كۇن قۋاتى جانە مۇناي ءوندىرىسى قۇرال-جابدىعى، جۇك كولىكتەرىن جيناۋ، شاراپ كاسىپورىندارىنىڭ الەۋەتى تانىستىرىلدى.  

ساپاردىڭ ايرىقشا اتاپ وتەر تۇسى، جۇڭگو مەن رەسەي بىرىككەن جوعارى تەحنولوگيالى دەمونستراسيالىق بازاسىنا ساپار بولدى. بۇل جۇڭگو ۇكىمەتى قارقىندى قولعا العان «ءبىر جول - ءبىر بەلدەۋ» جوباسىنىڭ ءىس جۇزىندەگى ناقتى كورىنىسى. جوبا اياسىندا جۇڭگو ۇكىمەتى قازاقستانمەن ىنتىماقتاستىقتى تەرەڭدەتىپ، وندىرىستىك الماسۋعا اسا ىنتىزار. 

پىكىر قالدىرۋ

قاتىستى ماقالالار