Елімізде көңіл көтеру орындарының жұмыс уақытын түнгі 2-ге дейін шектеу ұсынылды

Президент әкімшілігі сәуірде есірткі қылмысымен күреске арналған жиында ойын-сауық орындарының уақытын шектеуді ұсынды. Олардың айтуынша, түнгі клубтарда адамдар ішімдік ішіп, есірткі тұтынады, салдарынан қылмыс жасайды. 
Ойын-сауық орындарының иелері жұмыс уақытын шектеуге қарсы. Үкімет кофеханалар, барлар мен түнгі клубтардың жұмысын түнгі сағат 2-ге дейін қысқартатын құжат әзірлеп жатыр. Бұл қылмыспен күресу үшін жасалып отыр.

“Премьер-министрдің орынбасары Байназаров. Н.С. "Атамекен" ұлттық кәсіпкерлер палатасымен бірлесіп, 15 маусымға дейін ойын-сауық мекемелерінің жұмыс уақытын 2:00-ге дейін заңнамалық тұрғыдан шектеу туралы ұсыныстар енгізсін”, – делінген президент әкімшілігінің басшысымен кездесу хаттамасында. Көпшілік бұл ұсынысты қолдамайды. “Алкогольді өнімдерді сатуды бақылау керек шығар. Ал шектеудің өзі қылмыс деңгейіне әсер етпейді. Жастар түнде қыдырғанды ұнатады. Бірақ мұның қылмыс жасауға еш қатысы жоқ. 5-16% қылмыс қана мас күйде жасалған, бірақ бұл қылмысқа әсер етпейді деп ойлаймын”, – деді прокуратураның бұрынғы қызметкері Дәулет Шаматаев.

Бөлшек сауда және қоғамдық тамақтандыру қауымдастығы да мұндай шектеулерге қарсы. Кәсіпкерлер бұл конституцияға, сауда заңнамасына және кәсіпкерлік кодекске қайшы келеді деп есептейді.

“Бұл талапты заңсыз деп есептейміз. Орынсыз нәрселерді ойлап табудың қажеті жоқ. Нормативтік-құқықтық актілерде бәрі әлдеқашан жазылған. Полиция өз шараларын құқықбұзушылықтар мен қылмыстардың алдын алуға бағыттауы керек. Ал қылмыс қайталана берсе немесе қандай да бір ауыр қылмыс жасалған жағдайда сот тәртібімен қызметті тоқтата тұрады”, – деп мәлімдеді бөлшек сауда және қоғамдық тамақтандыру қауымдастығының вице-президенті Ольга Егорова. Пандемия кезінде ойын-сауық бизнесі қатты зардап шекті, көптеген түнгі клубтар жабылды, ал қалғандары дағдарыстан енді ғана шығып жатыр дейді қоғам белсенділері. Жаңа шектеулер қысым мен бюджетке түсетін салықты төмендетеді.