ІІМ: Қаза тапқан курсант интернет-казино мен букмекерлік кеңселерге ақша салған

Қазақстанның ішкі істер министрі Ерлан Тұрғымбаев өзіне қол жұмсаған курсант оқыған ІІМ Алматы академисына барды, деп хабарлады polisia.kz.

Оқу орнында курсанттың қаза болуына байланысты кешенді тексеру жүргізілуде. Министрге тексерудің алдын ала нәтижелері туралы арнайы топтың басшысы – ІІМ кадр саясаты департаментінің бастығы Айдар Сайтбеков баяндады. Ол оқу орнының тек қана тұрмыстық жағдайы, материалдық-техникалық жабдықталуы ғана емес, оқытушылар мен курсанттар арасындағы моральдық-психологиялық ахуал да зерттеліп жатқанын атап өтті.

Оның айтуынша, қазіргі уақытта жүйелі түрде заңсыз ақша жинау фактілері расталмаған. Дегенмен, курсанттар туыстарының оқу орнындағы ықтимал қысым көрсетушілік туралы хабарламалары да мұқият зерттелуде.

– Студенттер арасында әлеуметтік-психологиялық зерттеу жүргізу барысында өзіне қол жұмсаған курсанттың әртүрлі сылтаулармен туыстарынан үнемі ақша сұрайтыны анықталды. Ол сондай-ақ өзге курсанттардан қарызға ақша алып, оның көпшілігін қайтармаған. Курсанттардың айтуы бойынша, курсант соңғы кезде интернет-казино мен букмекерлік кеңселерге салымдар салумен айналысқан. Курсант Саламат Өтегенов туысқандары мен таныстарынан түрлі сомаларды осы мақсатқа алып отырды ма деген болжам бар. Сонымен қатар, қылмыстық істі тергеу аясында болған оқиғаның барлық нұсқалары тексерілуде, – деп баяндады Айдар Сайтбеков.

Оқу орнын аралау барысында Ерлан Тұрғымбаев оқу үдерісін ұйымдастыру мәселелерімен, сондай-ақ курсанттардың казармада тұру жағдайымен танысты. Министр сондай-ақ академияның оқытушыларымен, курсанттарымен және курсанттардың ата-аналарымен кездесті. ІІМ басшысы жақын арада жаңа басшылық тағайындалатынын, оның басты міндеті – курсанттардың тәртіп деңгейі мен кәсіби даярлығын арттыру екенін атап өтті.

– ЖОО әкімшіліктері курсанттардың оқу орнында болған кезеңіндегі қауіпсіздігін қамтамасыз етуге міндетті. Тәртіпті бұзуға жол бермей және олармен үнемі тәрбие жұмысын жүргізуге тиіс. Бүгінгі таңда ішкі істер органдары жоғары білімді және кәсіби кадрларды қажет етеді. Қазақстан полициясының болашағы оқу орындарының қабырғасында алатын білім мен моральдық-психологиялық дайындыққа байланысты екенін есте сақтау қажет, – деді Ерлан Тұрғымбаев.

Ведомство басшысы бұл қайғылы оқиға тәрбие жұмысындағы проблемаларды көрсеткенін айтты.

– Біз болашақ полицейлерді дайындау бағдарламасына өзгерістер енгізуіміз керек. Үнемі психологиялық мониторинг жүргізу қажет, – деп атап өтті министр.

Ерлан Тұрғымбаев тергеу барысын жеке бақылауына алып, нәтижесі туралы тұрақты баяндауды тапсырды.

Еске салсақ, ІІМ бұйрығымен өзіне сеніп тапсырылған бөліністегі ұйымдастыру жұмыстарына тиісті қадағалаудың болмауына байланысты скадемия бастығы О.Х. Смаилов атқарып отырған лауазымынан босатылды. Сонымен қатар, академияның тағы 16 жауапты қызметкері қатаң тәртіптік жауапкершілікке тартылды, олардың бесеуі де лауазымдарынан босатылды.