Назарбаев: Халық арасында беделі биік жаңа көшбасшыларымыз бар

Елбасы Нұрсұлтан Назарбаев "Nur Otan" партиясының республикалық сайлауалды штабына барды. Бұл туралы elbasy.kz сайты хабарлады. 

Сағат 00:00-де exit poll нәтижелері баяндалған жаңалықтар шығарылымы қаралды. Еxit poll қорытындысына сәйкес "Nur Otan" партиясы сайлаушылардың 71,97 пайыз дауысын жинаған.

– Баршаңызды "Nur Otan" партиясының айқын жеңісімен құттықтаймын. Екзит полдың алдын ала нәтижелері қазақстандықтар еліміздің әрі қарай дамуын біздің партиямызбен байланыстыратынын көрсетті. Сайлаудың ел тәуелсіздігінің отыз жылдығымен тұспа-тұс келуінің символдық мәні бар. Осы уақытта орасан зор жұмыс атқарылды. Ең бастысы ­– жаңа ауқымды мақсаттарға қол жеткізу үшін берік негіз қаланды.

Әлемде коронавирус індетіне шалдыққандар саны артуда. Дүниежүзілік банк әлемдік экономиканың құлдырауы мен жұмыссыздық өседі деп болжап отыр. Бұл жағдайда біртұтас саяси күштің айналасына топтасқан қоғам ғана жеңіске жетеді, ­– деді Елбасы.

Нұрсұлтан Назарбаев бүгінгі жетістік жұмыла атқарылған жұмыс пен партияның әрбір мүшесінің еселі еңбегінің нәтижесі екенін атап өтті.

– Баршаңызға атқарылған жұмыс үшін ризашылығымды білдіремін және тек жақсылық тілеймін. Науқан тиімді әрі нәтижелі өтті. Партия қатары жаңарды. Халық арасында беделі биік жаңа көшбасшыларымыз бар. Әр ауданның, қаланың, облыстың дамуы үшін халықтық бағдарламалар әзірленді. "Nur Otan" партиясының басты мақсаты – халықтың тұрмысын жақсарту және елдігімізді нығайта беру. Ел болып біріге білсек, алынбайтын асу жоқ. Басымызға түскен қиындықтарды біз әрдайым бірге еңсеріп, жетістіктерге бірлесе жетеміз. Баршаңызды партиямыздың бүгінгі жеңісімен құттықтаймын, – деді партия төрағасы.

Елбасы "Nur Otan" партиясының сайлауалды бағдарламасы бес институционалдық реформаның, соның ішінде мемлекет басшысының халыққа жолдауында берген тапсырмаларының жалғасы екенін айтты.