Бүгін мәжілістің жалпы отырысында "Ақ жол" фракциясының депутаты Берік Дүйсенбинов жоғары оқу орындарының жекеменшік жерлеріне қатысты депутаттық сауал жолдады.

Дүйсенбинов атап өткендей, әл-Фараби атындағы Қазақ Ұлттық университетінің жер аумағы белгісіз себептермен азайып қалған және осы мәселе қоғамды алаңдатып отыр.

– Жер құқығы бойынша сарапшы, заңгер Бақытжан Базарбектің мәліметтеріне сүйенсек, 2012 жылғы 30 қаңтардағы Алматы қаласы әкімінің қаулысына сәйкес eниверситеттің пайдалану құқығына жалпы көлемі 73,26 гектар жер берілген. Ал 2017 жылы 2 қазанда Алматы қаласы әкімінің № 4/392-22-36 деген қаулысына сәйкес ҚазҰУ-нің жалпы жері үлестерге бөлініп, жер көлемі 72,48 гектар болып шықты. Соның ішінде ҚазҰУ-нің тікелей үлесін алатын болсақ, ол – 71,40 гектар жер, яғни, оқу орнының жалпы жер көлемі 1,8 гектарға азайғанын байқаймыз, – дейді депутат.

"Университетке тиесілі жер көлемі неге азайған?" деген сұрақ ешқандай уәкілетті орган нақты жауап бермеген. Берік Дүйсенбинов атап өткендей, жер мәселесі тек бұл университетпен ғана шектеліп отырған жоқ.

– Елдің әр аймағында жоғары оқу орындары жер телімдерінің жекеменшікке сатылып жатқанын, студент жастар тұратын жатақханалардың азайып, университет меншігіндегі оқу процестерін қамтамасыз ететін қосымша жылжымайтын мүлік обектілерінің саудаға салынып жатқанынан бұқаралық ақпарат құралдарынан және барлығын көріп-біліп отырған елдің аузынан естіп жүрміз. Мысалы, Шығыс Қазақстан мемлекеттік университетінің бас ғимаратынан он қадам қашықтықта орналасқан өндірістік шеберхана бүгінде ойын-сауық орнына айналған, – деді депутат.

Аталған мәселелердің маңыздылығын баяндаған "Ақ жол" фракциясының депутаттары біріншіден, Қазақ Ұлттық университетіне тиесілі жер аумағынан жер учаскелерінің бөлініп шығарылғаны қаншалықты заңды екенін тексеріп, заңсыздық анықталған жағдайда тиісті адамдарды жауапқа тартуды, екіншіден, осындай тексеруді облыстарда орналасқан жоғары оқу орындарында да жүргізіп, нәтижесін бізге хабарлауды талап етті.

"Қамшы" сілтейді

Қате тапсаңыз, қажетті бөлікті таңдап ctrl+enter басыңыз.

Баннер

Пікір қалдыру

пікір