Полиция Әлия Назарбаеваның рейдерлік әрекеті бойынша қылмыстық іс қозғаудан бас тартты

"Осы жылдың 14 наурызында мемлекет басшысы Тоқаев Бас прокурор Асыловпен кәсіпті бопсалаушылардан қорғау тақырыбында кездесу өткізді. Ал 19 ақпанда Меғдат Қалиев екеуіміз Бас прокуратураға арыз жаздық. Президентіміздің тапсырмасына қарамастан, Бас прокуратура істі ҚМА-ға жібереді, дегенмен ҚМА-дан маған ешкім хабарласпады және ешқандай тергеу әрекеттерін жүргізбеді.

Олар мені Алмалы аудандық ішкі істер бөліміне дейін апарды, бірақ менің Алмалы ауданына мүлдем қатысым жоқ, тіпті онда тұруға ықтиярхатым да жоқ. Біз келдік, арызымыз бойынша түсініктеме бердік, қағаз жүзінде дәлелдер әкелдік. Президент тапсырмасына қарамастан, олар құжатты дұрыс қарамады, күні кеше қылмыстық іс қозғаудан бас тартып, конституциялық құқығымызды қайта бұзды", - деді Бимурзин ҚазТАГ редакциясына берген сұхбатында.

Ол Алматы қаласы Алмалы аудандық ішкі істер бөлімінен Назарбаеваға және басқа да тұлғаларға қатысты арыз номенклатуралық іс ретінде есептен шығарылғанын көрсететін хаттың көшірмесін ұсынды.

"Бұл - қылмыстық істі қараудан бас тарту туралы жауап, біз қазір осы іс бойынша шағым түсірдік және оны тергеу сотына жібереміз", - деп атап өтті Бимурзин.

Еске салсақ, Бимурзин 28 ақпанда серіктесі Қалиев екеуі Назарбаева мен Рогованың рейдерлік шабуылының құрбаны болғанын хабарлаған болатын.

"2003 жылы (Назарбаева – ред) өз ықпалын пайдалана отырып, құны 170 миллион долларды құрайтын (2003 жылғы есеп бойынша) жеті мұнай базасы мен 96 жанармай құю станциясынан тұратын жұмыс істеп тұрған кәсіпорынды басып алды. Рейд үшін ол бұрынғы иелерін түрмеге қамап, дене жарақатын саламын деп қорқытты. Тіпті ол күндіз Алматының орталығында кәсіп иелерінің бірінің әкесін ашықтан-ашық ұрлап әкеткен және куәгерлердің айтуынша, ұрлауға құқық қорғау қызметкерлерінің қатысы болуы мүмкін", - деп айтқан болатын кәсіпкерлер.

14 наурызда Бас прокуратура Назарбаеваның рейдерлік әрекеті туралы арызын тіркегенін хабарлады.