Қазақстан мен Ресей арасындағы әуе рейстерінің саны артады

Қазақстан мен Ресей арасындағы рейстер мен бағыттар саны артады. Бұл туралы Қазақстан Республикасы Премьер-Министрінің бірінші орынбасары Роман Скляр мен Ресей Федерациясы Үкіметі Төрағасының орынбасары Виталий Савельевтің кездесуі кезінде белгілі болды.

Кездесу барысында Қазақстан мен Ресейдің ірі қалалары арасындағы іскерлік және туристік трафиктің өсіп келе жатқанын ескере отырып, әуе рейстерінің санын ұлғайту перспективалары талқыланды.

Сонымен қатар, тараптар теміржол және автомобиль көлігі, азаматтық авиация, оның ішінде жолаушылар және жүк тасымалы, жол-көлік инфрақұрылымын жаңғырту, сондай-ақ халықаралық көлік дәліздерін дамыту салаларындағы өзара іс-қимылдың жоғары деңгейін растады.

Кездесу қорытындысы бойынша тараптар Қазақстан-Ресей шекарасындағы автомобиль өткізу пункттерінің жұмысын бірлесіп тексеруге келісті.