Қазақстан әскері дабыл бойынша көтерілді

Бүгін Қарулы Күштердің барлық түрлерінің, әскер тектерінің, өңірлік қолбасшылықтардың, құрамалардың, әскери бөлімдер мен мекемелердің жеке құрамы дабыл қағу бойынша көтерілді, деп хабарлайды республиканың қорғаныс министрлігі.

Қарулы Күштер жауынгерлік дайындық сабақтарын өткізу шеңберінде дабыл бойынша көтерілді, деп нақтылады ведомства өкілдері.

Қарулы Күштердегі осы іс-шаралардан дәстүрлі түрде жазғы оқу кезеңі басталады. Ол 1 маусымда басталып, 31 қазанда аяқталады.

"Тұрақты орналасу пункттерінде, полигондарда, әуеайлақтарда, бастапқы позицияларда және теңізде жүктелген жауынгерлік міндеттерді орындауға дайындық мәселелері және әрбір әскери қызметшінің іс-қимыл тәртібі іс жүзінде пысықталуда. Техниканың шығуымен және белгіленген орындарда басқару пункттерін орналастырумен жаттығулар мен сабақтар өткізіледі", - делінген хабарламада.

Әскерлердің ықтимал қауіптерге ден қою қабілеті, бірлестіктер, құрамалар мен әскери бөлімдер арасындағы түраралық өзара іс-қимылды ұйымдастыру деңгейі тексеріледі.

Бұл іс-шаралар әскери басқару органдары жұмысының үйлесімділігін арттыруға, басқа әскерлермен және әскери құралымдармен өзара іс-қимылдың тиімділігін арттыруға, сондай-ақ жеке құрамның практикалық дағдыларын жетілдіруге ықпал етеді.

Бұған дейін Қорғаныс министрлігіне жауынгерлік техниканы ауыстыру туралы ескертілген болатын. 3-6 маусым аралығында елімізде Қарулы Күштердің жауынгерлік дайындығы бойынша жаттығулар өткізіледі. Ол үшін әскери техника шерумен және теміржол көлігімен Қазақстанның түрлі өңірлеріндегі полигондарға ауыстырылады, деп атап өтті ведомствода.