• USD 468.56

  • EUR 497.56

  • RUB 7.3

  • CNY 67.18

29 Наурыз, 11:59:23
Алматы
+35°

Ішкі істер министрі Ерлан Тұрғымбаев аумақтық полиция департаменттерінің және бейінді қызметтердің басшыларымен кәмелетке толмағандарға қатысты зорлық-зомбылық қылмыстарының, сонымен қатар жасөспірімдер қылмысының алдын алу мәселелеріне арналған жиын өткізді, – деп Qamshy.kz ақпарат агенттігі хабарлайды.

Ведомствоның баспасөз қызметінің ақпаратына сүйенсек, министр бірқатар өңірлік департаменттердің балалардың қауіпсіздігін қамтамасыз ету, жасөспірімдерге қатысты қылмыстардың, оның ішінде пайдакүнемдікпен зорлық жасау, жыныстық сипатта тиісу сынды қылмыстардың өсуінің алдын алу бағытындағы жұмыстарының кемшіліктерін нақты көрсетіп берді.

Сондай-ақ Ақмола, Ақтөбе, Алматы, Атырау және Жамбыл облыстық Полиция департаменттерінің басшылары сынға ұшырады.

Кеңес қорытындысында бірқатар басшы қатаң тәртіптік жазаға тартылды. Атап айтқанда, Жамбыл облыстық полиция департаментінің бастығы Арман Оразалиевке қызметке толық сай еместігі ескертілді. Ал Ақтөбе облыстық полиция департаментінің бастығы Атығай Арыстановқа қатаң сөгіс жарияланды.

Еске салсақ, Алматы облыстық полиция департаментінің бастығы Мұрат Ұрымхановқа бұған дейін де қатаң сөгіс жарияланған еді.

Одан өзге Тараз қалалық Полиция басқармасының бастығы Ардақ Мадимаров қызметінен босатылды. Сондай-ақ  Тараз қалалық полиция басқармасы қызметтерінің басшылары жазаланып, мектеп инспекторы ішкі істер органдарынан қуылды.

Министрдің мәлімдеуінше, барлық өңірлік басшыларға жергілікті атқарушы органдармен бірлесіп, қордаланған проблемалы мәселелерді тыңғылықты саралап, шешу тапсырылды. Олардың қатарында учаскелік полиция мен мектеп инспекторларының жұмысын ұйымдастыруды өзгерту, олардың білім беру ұйымдарымен және әкімдікпен өзара іс-әрекеті, күзет ұйымдарын мектептер мен балабақшалардағы қауіпсіздікті қамтамасыз етуге жұмылдыру мәселелері бар.

«Аумақтық департаменттердің басшыларының назарын полицияны бағалаудың негізгі индикаторларының бірі кәмелетке толмағандардың қылмыстық озбырлықтан қорғалу деңгейі екендігіне аудартамын. Дәл осыны адамдар бізден күтіп отыр. Біз олардың қауіпсіздігін қамтамасыз етуге міндеттіміз», – деді Тұрғымбаев.

"Қамшы" сілтейді

Қате тапсаңыз, қажетті бөлікті таңдап ctrl+enter басыңыз.

Пікір қалдыру

пікір