Air Astana компаниясына қатысты тергеу нәтижелері жарияланды

Бәсекелестікті қорғау және дамыту агенттігінің басшысы Марат Омаров Air Astana әуекомпаниясына қатысты жүргізілген тергеу қорытындысын жариялады. Бұл туралы ол ведомствода өткен брифингте айтты. 

"Біз былтыр компанияның IPO қарсаңында Air Astana әуе компаниясына қатысты ірі тергеуді аяқтадық. Компания жанармайға қосымша төлемді негізсіз өзгерткен, бұл билет бағасының 6 пайызға өсуіне әкелді. Тиісті шешім қабылданып, айыппұл төленді", - деді спикер.

Еске салайық, бұған дейін Air Astana компаниясына 7 млрд теңге айыппұл салынған болатын. Сот компанияның әр әуе билетінен жанармайға қосымша ақы негізсіз өндіріп алды деп айыптаған болатын.