21 Қыркүйек, 2020 NEWS

Қазақстандықтар қандай көлік мініп жүр?

Фото: индустрия және инфрақұрылымдық даму министрлігінің сайты

Жыл басынан бері Қазақстанда 45 мың автомобиль шығарылып, олардың 5 мыңға жуығы Ресей, Беларусь және Өзбекстанға экспортқа жіберілген. Бұл туралы индустрия және инфрақұрылымдық даму министрлігі хабарлады.

Министрлік таратқан ақпараттық хабарламаға сай, тамыз айында отандық автодилерлер жалпы сомасы 94,4 млрд теңгеге 8 639 жеңіл автокөлік пен коммерциялық техниканы, сондай-ақ 1 112 жүк көлігі мен автобус сатқан. Бұл өткен жылдың тамызымен салыстырғанда 49,8 пайызға артық.

"Барлық сатылымдардың 67%-дан астамын бес түрлі марка құрайды. Бұл айда жеңіл автомобильдердің ішінде Hyundai маркалы көліктер ең көп сатылып, 1697-ге жетті. Аталған көрсеткіш биылғы шілде айымен салыстырғанда 37,1% көп. Екінші орында 1642 көрсеткішпен Lada автокөлігі тұр. Нарыққа наурызда оралған Chevrolet автокөліктерінің тамызда 1279-ы сатылып, 258% өсім көрсетті. Төртінші орында 1173 данасы сатылған Toyota автокөлігі. Өсім +38% құрады.

B сыныпты қолжетімді локализацияланған үлгілеріне сұраныс бұрынғысынша артып келеді.

Тамызда осы сегменттің бір бөлігін алатын Қостанайда құрастырылған Ravon автомобильдерінің 817 данасы сатылды. Алтыншы орында тұрған Kia көліктерінің 587-сі өткен айда сатылды. JAC дилерлері 408 автомобиль сатты. (+148,8%). Тамыз айында сегізінші орынға Volkswagen автомобильдері жайғасты. 281 данасы сатылып, +24,3% өсім көрсетті. Алғашқы ондықты түйіндейтін Nissan және Renault маркалары тиісінше 247 және 215 бірлікті құрап, 22,3% және 18,1% артқан.

Жеңіл модельдер бойынша тамызда 730 бірлігі сатылған Ravon Nexia R3 седан көш бастап тұр.  Екінші орынға алғаш рет Chevrolet Cobalt шықты – 675 седан. Тамыздың үздік үштігін 608 автомобиль нәтижесімен Lada Vesta түйіндеді. Төртінші орында – Hyundai Accent (553 бірлік). Бұдан әрі тізім бойынша: Toyota Camry (486 бірлік), Lada Granta (460 бірлік), Hyundai Tucson (422 бірлік), Kia Rio (343 бірлік), Hyundai Creta (330 бірлік), Lada 4x4 (299 бірлік)" делінген ақпараттық хабарламады.

Ілмек сөздер: отандық автоөндіріс

Қате тапсаңыз, қажетті бөлікті таңдап ctrl+enter басыңыз.

Баннер

Пікір қалдыру

пікір