Кентаудың бұрынғы әкімі 10 жылға сотталды

Сот Кентау қаласының бұрынғы әкімін пара алғаны үшін кінәлі деп танып, 10 жылға бас бостандығынан айырды, деп жазады Tengrinews.kz сайты.

Алматының қылмыстық істер жөніндегі мамандандырылған ауданаралық сотында Кентау қаласының экс-әкімі Дәурен Махажановқа қатысты үкім шықты. Ол қылмыстық кодекстің 366-бабы 4-бөлігі "Аса ірі мөлшерде пара алу" бойынша қылмыс жасағаны үшін кінәлі деп танылды.

"Сот Дәурен Сәбитұлы Махажановты 24-баптың 7-бөлігі ("Қылмысқа дайындалу және қылмыс жасауға оқталу") және ҚР ҚК-ның 366-бабы 4-бөлігі бойынша қылмыстық құқық бұзушылық жасағаны үшін кінәлі деп тануға үкім шығарды.  Мемлекеттік қызметте, сотта, Ұлттық банкте, ведомстволарда, Қаржы нарығы мен қаржы ұйымдарын реттеу және бақылау органдарында, мемлекеттік ұйымда және квазимемлекеттік сектор субъектілерінде қызмет атқаруға өмір бойына тыйым салу және он жыл мерзімге бас бостандығынан айыру түріндегі жаза тағайындалсын. Жазаны өтеу орны қылмыстық-атқару жүйесінің барынша қауіпсіз мекемелері болып тағайындалады. Мерзім сот үкімі заңды күшіне енген сәттен бастап есептеледі. 2022 жылдың 24 ақпанынан бастап қамауға алу мерзімі жаза мерзіміне есептелсін", - деген үкім шығарды Алматы қаласы қылмыстық істер жөніндегі мамандандырылған ауданаралық сотының судьясы Мәртпек Кәкімжанов.

Ііс бойынша басқа айыпталушылар – Лаврентий Бобрышев пен Бауыржан Түмебаев 368-баптың 1-бөлігі "Пара алудағы медиация" бойынша кінәлі деп танылды. Бобрышев бір жылға бас бостандығынан айырылды. Жазасын ең төменгі қауіпсіздік мекемесінде өтейді. Бауыржан Түмебаев бір жыл алты айға бас бостандығынан айырылған.

Сотталушылардан процессуалдық шығын ретінде 171 000 теңге өндірілді. Сондай-ақ, Махажановтан жәбірленушілерге өтемақы қорына 30 АЕК (шамамен 91 мың теңге) көлемінде төлемақы өндірілді. Бобрышев пен Түмебаевтың әрқайсынан 15 АЕК (шамамен 45 000 теңге) көлемінде өндірілді.

Сот үкіміне 15 күн ішінде шағым жасауға болатыны айтылды.