Қазақтың іші-сыртындағы проблемаларға қатысты күйініп пікір білдіріп отырсаң сабырға шақырып, тәубеңе кел дейтін сәуегейлер қаптап кетеді. Ал келдік тәубемізге. Бәріміз жамырап "тәубә" дейік. Қанеки! Мантра сияқты қылып мәнтрәпайттап айтайық: - Қазақтың бірлігінің жоқтығына "тәубә"! - Орысшаға судай қазаққа ана тілінің өгей болғанына "тәубә"! - Тәуелсізбіз деп жар салып, әлікүнге дейін Ресейдің боданы болып отырғанымызға "тәубә"! - Ширек ғасыр өзгеріс көрмеген, өзгеріп көрмеген коммунист билігіміздің болғанына "тәубә"! - Қуыршақтар мен саяси "жезөкшелер" қаптаған Парламенттің барына "тәубә"! - Халықтың қанын ішуді тоқтатпайтын, ұялмай өтірік айтып, асын ішіп, дағарасына тышып жүре беретін Үкіметтің барына "тәубә"! - Адам ұрық боп ішке түскеннен басы көрге жеткенше көлеңкесіндей еріп жүретін жемқор қоғамның болғанына "тәубә"! - Қағазда сызығы болғанмен қара жерде қазығы жоқ, ашық-шашық қорғансыз қалған шекарамыздың болғанына "тәубә"! - Халыққа қорған болуы керек сақшылардың халықты қанаушы, көшеде тонаушы болғанына "тәубә"! - Тарихта түрме көрмеген қазақтың абақтыда қалың елге айналып отырғанына "тәубә"! - Елбасының барына тәубе деп, баба аманатын да, ұрпақ алдындағы парызды да сол кісінің ғана мойнына арта салатын енжар, селқос қоғамның барына "тәубә"!