Баянауыл аэродромына 18 адамға арналған «Лет-410» жолаушылар ұшағы қонды, деп хабарлайды Qamshy.kz ақпарат агенттігі Павлодар жаңалықтарына сілтеме жасап.
Павлодардан шыққан 16 жолаушы Баянауылға жеңіл авиацияға жататын екі моторлы 18 орындық ұшақпен ұшып келді. Олардың ішінде Павлодар облысының әкімі Булат Бакауов та болған. Ұшақ 40 минутта жетті.
Рейске жергілікті әуе бағыттарында ұшу орындауда тәжірибесі бар «Жезқазған Эйр» компаниясы қызмет көрсеткен.
«Біз Павлодар - Баянауыл бағыты бойынша бірінші рет ұшып отырмыз. Ұшу сәтті аяқталды. Баянауыл аэродромы қонақтарды күтуге толық дайын деп ойлаймын», - деді ұшақ капитаны Сергей Терехов.
Айта кетсек, Баянауыл аэродромы өткен ғасырдың сексенінші жылдарының соңы мен тоқсаныншы жылдардың басында жабылған. Аэродромды қайта қалпына келтіруді Павлодар облысының әкімі алғашқылардың бірі болып ұсынған.
