«Көк тудың желбірегені» әні өз деңгейінде орындалып жүр ме?

http://youtu.be/iP47jLyWNcA

«Көк тудың желбірегенін»  әр қазақ жырлауға тиісті. Бірақ орнымен, мелодиясымен орындаса екен. Өз қалпында орындамаса, халыққа жетпейді. Ибрагим ініміз бұл әнді лирикаға айналдырып жіберіпті. Біз «Көк тудың желбірегені» әнін 2001 жылы 16 желтоқсанда Республика алаңында алғаш рет орындадық.  Халық керемет қабылдаған.  Сол үшін айрықша тер төктік десек артық айтқандық емес. Бұл ән біздің паспортымызға айналды.  «Қазақ радиосының» Алтын қорына енді. Әннің авторы Ермұрат марқұм тірі кезінде ерекше ризашылығын білдірген. 2007 жылы ән сөзінің авторы Алмас Ахметбек демеуші болып,  Оралхан Сәдуақастың оранжировкасымен қайта өңдеп орындадық.  Алдағы уақытта рухты оятатындай етіп, клип түсірейік деп жатырмыз.  

Ибрагим бауырымызға айтырмыз, мұндай биік әнді шынайы деңгейі, өресі жетсе орындасын.  Осы әннің халыққа жетуі үшін 11 жыл тер төктік. Ал оны бұл бауырымыз алады да, лирикаға ауыстырады. Бұл – үлкен қателік. Тіпті алғаш орындаушылардың бірі осы кісілер ғой деп бір ауыз рұқсат сұрауды да білген жоқ. Ермұрат марқұмның жан дүниесін тебірентіп шығарған мұндай әуенді қалай болса солай  бұзуға болмайды. Өйткені, «Бұл әннің бағын сендер аштыңдар, сендер көтеріңдер» деп, Ермұрат марқұм бізге аманаттағандай болып еді. http://youtu.be/alOTLSogUak

Бұл ән 1999 жылы шықты. Ән болып, қатарға қосылғаны 2000 жылдары. Ермұрттың бірінші концертінде Майрам  Мұхамедқызы орындаған. Бұл әнді эстрадада айтып жүргеніне көңілім толмайды. Мелодиясына өзгерістер жасаған, біраз жерінде қателік бар. Бірақ халыққа таратып жүргеніне рахмет айтамыз.  «Біреудің  жолына ізденіс жасасаң, дұрыстап жаса» дейді ғой. Ермұрат марқұм тірі болса, «мына жерін былай айту керек, мына жерін былай орындау керек» деп Ибрагимге ескертетіні сөзсіз еді... Біз әрқашан өз нұсқамызбен орындай береміз. Кеше Конституция күніне орай Республика сарайының алдында өткен концертте де Ермұраттың нотасы бойынша орындап шықтым. http://youtu.be/ldTxogCeNy8

– Бұл ән мен сүйіп тыңдайтын әндердің бірі. Жақында Ибрагим Ескендірдің орындауында тыңдап тағы бір риза болдық. Дегенмен әннің бұлайша лирикалық ән болуына әркім әртүрлі пікір айтуда. Жалпы, сазгердің өз қалауы бойынша осылай орындалып жатса, әрине, қарсы емеспіз. Бірақ ертең тағы біреулер басқа жанрға салып немесе өз қалауынша өзгертіп жатса, керемет әннің қадірі қашады деп ойлаймын. Әннің сөзін жазған ақын Алмас Ахметбекұлының пікірін білу үшін хабарласқанымызда, ол өзінің Қытайда сапарда жүргенін айтты. Егер осы пікірлерге байланысты Ибрагим Ескендір өз жауабын айтып жатса, оны да өз қалпында оқырманға ұсынуға бармыз.