Жоғарғы Сот мектептерде орамал тағуға тыйым салуды жойған жоқ

Жоғарғы сот бұқаралық ақпарат құралдары мен әлеуметтік желілерде тарап жатқан "мектептерде орамал тағу заңды деп танылды" деген ақпарат жалған екеннін мәлімдеді.

Хабарламада істі қарау аясында Жоғарғы Соттың әкімшілік істер жөніндегі сот алқасы білім беру мекемесінде орамал тағудың заңдылығы жөніндегі мәселені талқылауға араласпағаны айтылады.

"Кассациялық саты мектептің оқушыны сабаққа жібермеуін заңсыз деп таныды, өйткені білім алу құқығы Қазақстан Республикасы азаматтарының негізгі конституциялық құқықтарының бірі болып табылады. Сонымен қатар, бейінді Министрлікте орта білім беру ұйымдары үшін міндетті мектеп формасына қойылатын талаптарды бекіту жөніндегі өкілеттіктер бар. Министрдің тиісті бұйрығы заңсыз деп танылмаған және күші жойылмаған. Сондай-ақ, ата-аналар мектеп жарғысы мен мектеп формасына қойылатын талаптарды сақтау міндетіне жауапты екенін атап өтеміз" делінген Жоғарғы сот хабарламасында.