Тексеріс қорытындысы бойынша, ұшақтардың қозғалтқышынан май аққаны, әйнектердің қатпарлануы, конструкцияны қорғау үшін скотч қолданылғаны және дөңгелектердің тозғаны анықталды деп хабарлайды Qamshy.kz ақпарат агенттігі Tengrinews.kz сайты дерегіне  сүйене отырып.

Нақтырақ айтқанда, әуе кемелерін тексергеннен кейінгі британиялық инспекторлар шығарған қорытынды мен суреттерін Қазақстан авиациялық әкімшілігінің ұшу қауіпсіздігі департаментінің басшысы Линда Орледи брифингте таныстырған.

"Ұшақтың алдыңғы жағы зақымданған. Мәселе оның артында радардың тұрғанында. Әуе кемесінің бортында орнатылған радардың дұрыс жұмыс істеуі үшін жағдайдың жасалуы өте маңызды", - деп түсіндірді ол. "Екі қозғалтқышта да идентификациялық тақтайшалар жоқ. Бұл өте маңызды ескерту. Олар міндетті түрде болуы керек. Bek Air ұшақтарының 50 пайызында екі қозғалтқышта да идентификациялық тақтайшалар жоқ. Бұл өте қауіпті белгі", - деді Орледи.

"Мұнда майдың аққаны көрінеді. Мен, ұшқыш ретінде, өз әуе кемемде мұндайды көргім келмейді. Сондай-ақ, техникалық қызмет көрсету жөніндегі инженер ондайды байқаса, кейін қай күні, қанша сұйықтық жоғалғанын қадағалау маңызды. Біз майдың аққаны тіркелген бірде-бір тізілімді таба алмадық. Инспекторлар әрбір Bek Air ұшағының астынан осындай кемшіліктер тапты", - деді Орледи.

 Маманның айтуынша, барлық ұшаққа металл скотч жабыстырылған. Әуе кемесінде скотч қолдануға болады, бірақ бұл арнайы скотч болуы тиіс және оны пайдалану дерегі жазбаша бекітілуі керек. Ол бойынша ешқандай құжат табылмаған.

"Ұшқыштар кабинасы көп қабатты әйнекпен қорғалуы тиіс. Мұнда пилоттар кабинасының сол терезенің әйнегі қатпарланып кеткенін көресіз", - дейді Қазақстан авиациялық әкімшілігінің ұшу қауіпсіздігі департаментінің басшысы.

Сонымен бірге, Bek Air ұшақтарының жүк салатын жеріндегі панельдерде өртке қарсы таспалары жоқ болып шыққан. Бар деген жағдайда да нашар екені анықталған. Сондай-ақ,  дөңгелектері де тозған.