Т. Жаманқұлов ақша жымқырғанын мойындады

Сәрсенбі күні Сыбайлас жемқорлыққа қарсы іс-қимыл жөніндегі Ұлттық бюро ұстаған «Феникс» фильмінің продюсері Тұңғышбай Жаманқұлов фильмді түсіруге бөлінген бюджет қаржысын жымқырғанын толығымен мойындап, ісіне өкінетінін және келтірілген шығынды өтейтінін жеткізді, - деп жазады Baq.kz.

Сыбайлас жемқорлыққа қарсы іс-қимыл ұлттық бюросы баспасөз қызметінің мәліметінше, Жаманқұлов қаржыны қолма-қол ақшаға айналдырып, ұрланған бюджет қаржысын жеке басына жұмсағанын растады.

Сондай-ақ Т.Жаманқұлов өзіне кепіл түрінде бұлтартпау шарасын таңдауды және ҚР ҚК 65-бабына сәйкес, кінәсін мойындауына байланысты қылмыстық жауапкершіліктен босатуды өтінді.

3 қараша күні Т.Жаманқұлов шығынды жарым-жартылай өтеді. Сол себепті оның жасы, атақ-абыройы мен кепіл мүлікті енгізгені ескеріліп, оған қатысты «кепіл» түрінде бұлтартпау шарасы таңдалды.

Қылмыстық жауапкершіліктен босату туралы қолдаухат Т.Жаманқұлов, Н.Юдина және Г.Ысқақова келтірген шығын толық өтелгеннен кейін қаралады.