Көктемгі егіс жұмыстарына 400,9 мың тонна дизель бөлінді

Энергетика және Ауыл шаруашылығы министрліктері 1 ақпан мен 30 маусым аралығында 2025 жылғы көктемгі егіс жұмыстарына 400,9 мың тонна дизель отынын жеткізу кестесін бекітті. Бұл туралы Энергетика вице-министрі Ақкенженов хабарлады.

Дизель отынының бағасы қосылған құн салығын қоса есептегенде 1 литріне 254 теңге болып белгіленді.

Ауыл шаруашылығы өндірушілері үшін отын қозғалысының ашықтығын қамтамасыз ету мақсатында:

• жеке ПИН-кодтар енгізілді;

• дизель отыны түрлі түстерге (сары, көк, қызыл) боялды;

• электронды шот-фактура жүйесінде арнайы виртуалды қойма құрылды.

Министрлік ақпаратына сәйкес, ақпан-сәуір аралығында қажетті көлемнің 54%-ы (215 мың тонна) жөнелтілген. Дизельді уақытылы жеткізу үшін жеткізушілер шарт жасалғаннан кейін 10 жұмыс күні ішінде төлем жасауға міндетті. Жеткізу басым тәртіппен және тұрақты бақылаумен жүзеге асырылады.