Samsung алғашқы мульти-бүктемелі смартфонын таныстырды

Samsung Electronics қытайлық брендтердің қарқыны артып тұрған тұста, көпбүктемелі алғашқы смартфоны — Galaxy Z TriFold-ты ресми түрде таныстырды. Құрылғы 12 желтоқсанда Оңтүстік Кореяда сатылымға шығып, кейін Қытай, Тайвань, Сингапур және БАӘ нарықтарына жол тартады. АҚШ-та TriFold 2026 жылдың алғашқы тоқсанында ұсынылады. Смартфон 16 ГБ жедел жады, 512 ГБ сақтау орны және шамамен $2 449 бағасымен келеді.

Galaxy Z TriFold екі ішке бүктелетін топса арқылы 10 дюймдік кең экранға ашылады және үш қолданбаны қатар іске қосу, компьютерге ұқсас жұмыс режимін пайдалану мүмкіндіктерін ұсынады. Модель Samsung-ның foldable санатындағы ең үлкен аккумуляторымен жабдықталған және 30 минутта 50% қуатталатын жылдам зарядтауды қолдайды. Сонымен қатар, құрылғы IP48 стандарты бойынша суға төзімді.

Сарапшылар Samsung-ның бұл қадамын нарықтағы қатал бәсекелестікке, әсіресе Huawei мен Honor секілді қытайлық компаниялардың белсенділігіне жауап ретінде бағалап отыр. Компания TriFold моделін шектеулі тиражбен шығармақ, ал, оның басты мақсаттарының бірі — жаңа буын топса, экран беріктігі және софт өнімділігін нақты қолданушылар арқылы сынау екенін мәлімдеді.