پرەزيدەنت ءوزىنىڭ "ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم" اتتى حالىققا جولداۋىندا ەلىمىزدىڭ ونەركاسىپتىك الەۋەتىن اشۋعا جۇيەلى كۇش سالۋ قاجەتتىگىن باسا ايتتى. قاسىم-جومارت توقايەۆ تەرەڭ وڭدەۋ ءتاسىلىن مەڭگەرۋگە باسىمدىق بەرىلگەن 17 ءىرى جوبانىڭ ءتىزىمىن اتاپ ءوتتى.

ءوز شيكىزاتىمىز بەن قۇرال-جابدىقتارىمىزدى بارىنشا پايدالانۋ، ءىرى كاسىپورىندارعا جاپسارلاس وندىرىستەر اشۋ ماڭىزدى. جوبالار ەكونوميكانى ءارتاراپتاندىرۋ جانە وڭدەۋ ونەركاسىبىنىڭ باسەكەگە قابىلەتتىلىگىن ىنتالاندىرۋ باعدارلاماسى شەڭبەرىندە ىرىكتەلدى. ولار مەتاللۋرگيا، حيميا، مۇناي-حيميا، اۆتوكولىك، تۋريزم، اۋىل شارۋاشىلىعى جانە تاماق ونەركاسىبى سياقتى نەگىزگى سالالاردى قامتيدى.

جوبالار ءتىزىمى نەگىزگى كريتەرييلەر بويىنشا تاڭدالدى:

ءونىمدى قايتا ءبولۋدىڭ ورتاشا جانە جوعارى دەڭگەيى؛

ەكسپورتقا جانە يمپورتتى الماستىرۋعا باعدارلانۋ؛

وندىرىلەتىن ونىمگە نارىقتىق سۇرانىس؛

ەل نەمەسە ايماق ەكونوميكاسى ءۇشىن ستراتەگيالىق ماڭىزدىلىعى – مۋلتيپليكاتيۆتى اسەر.

اتالعان جوبالارعا ينۆەستيسيا كولەمى شامامەن 15 ترلن تەڭگەنى قۇراپ، 25 مىڭنان استام جۇمىس ورنى قۇرىلادى. كۇتىلەتىن ەكونوميكالىق تيىمدىلىك ەكسپورت كولەمىنىڭ 6 ترلن تەڭگەگە ارتۋى جانە يمپورتقا تاۋەلدىلىكتىڭ 1،5 ترلن تەڭگەگە تومەندەۋىن قامتيدى.