«Әлеуметтік желіде менің бауырлас халыққа қарата айтқан сөздерім кездейсоқ айтылды. Ол эмоцияның сыртқа төгілуі еді». Бұл оралдық бард әнші, ұлтаралық араздық туғызды деп айыпталып жатқан Жанат Есентаевтың жазған хатынан үзінді. Оралдық саясаткер тергеу органдары мен қоғам мүшелеріне өзінің ісіне шын өкінетінін айтып, хат жолдап отыр. Бұл туралы Qamshy.kz хабарлайды.

Хатта Жанат Есентаев өз шығармашылығына әр қашан Отанға деген сүйіспеншілікті, еркіндек пен халыққа деген махаббатты арқау еткенін, ешқандай жаппай тәртіпсіздіктер мен заң бұзушылықтар туралы ойламағанын айтады.

«Мен ешқашан Қазақстанымызда соғыс пен күйреу болғанын тілемедім. Қазақтар ең бейбітшілік сүйгіш халық болған, болып отыр, бола да бермек. біз барлығымыз бейбітшілік пен келісімде өмір сүруіміз керек», - деген ол Қазақстанда қандай да бір күрделі жағдай бола қалса өзінің ешқандай арандатушыларға ермейтінін айтады. Сондай-ақ ол, өз сөздері біреулердің ұлттық сезіміне нұқсан келтірсе, кешірім сұрайтынын айтады.

«Осы хатпен мен қоғамға, тергеу органдарына өзімнің орыстарды қорлау туралы арам ойым болмағанын жеткізгім келеді. Егер менің сөздерім біреулердің намысына тисе, шын көңіліммен кешірім сұраймын», - дейді әнші.

«Триуба» газеті саясаткер-әншінің жақында бостандыққа шығатынын, мәселенің бұлай шешілуіне қоғам белсенділері Мұхтар Тайжан мен Гүлжан Ерғалиеваның себеп болғанын жазады.