Димаштың өнерін сыйлаған Джеки Чан қазақтың оюлы шапанын киді

Қытайдағы "Мен әншімін" жобасында өнер көрсетіп жатқан отандасымыз Димаш Құдайберген Джеки Чанмен кездесті.

Бұл туралы Димаштың әкесі Қанат Айтбаев әлеуметтік желіде жариялады.

"Бүгін Бейжіңде Димашымыз атақты актер Джеки Чанмен кездесті! Димаштың әндерін телеарна арқылы тыңдап, ұнатып, кездесуге ынта білдіріпті. Өте керемет кездесу болды! Джеки мырза Димашқа өзінің күртесі мен фирмалық музыкалық құрылғысын сыйға тартты, біз өз кезегімізде оның иығына қазақы шапан жауып, домбыра сыйладық!", - деп жазды Димашқа қолдау білдіріп, қасында жүрген әкесі Қанат Айтбаев.

Димаш та әлеуметтік желіде өзін Джеки Чанның арнаулы шақырғанын жазды.

"Бүгін менің өмірімде тариxи есте қалатын ерекше күн! Атақты актер Джеки Чан мырза мені теледидардан көріп, кездесуге шақырды! Кездесуде актер маған өзінің эксклюзивті күртешесін және арнайы фирмалық ән тыңдау құрылғысын сыйға тартты! Ал мен актерге қазақтың шапанын жауып, домбыраны сыйға тарттым! Домбырамен бір күй шертіп беруімді өтінген Джеки Чанға Нұрғисаның "Әлқисасынан" шашу шаштым! Өз кезегінде актер маған соңғы "Kung Fu Yoga" кинокартинасындағы би қимылдарын үйретті. Бала кезімнен бері келе жатқан сүйікті актерім маған өз ақыл кеңестерін беріп, шығармашылығымды бақылайтынын айтты. Сөз соңында, барша Қазақстан xалқын жаңа жыл мерекесімен құттықтап, әдемі лебіз-тілегін білдірді! Келесі кездесуді асыға күтеміз! Армандар орындалады!..", - деп жазды Димаш қазақ және қытай тілдерінде.