Бүгін ҚР Тұңғыш Президенті – Елбасы қоры жанындағы Әлемдік экономика және саясат институтында (ӘЭСИ) мемлекеттік органдар, ұлттық компаниялар, сарапшылар және ғалымдардың қатысуымен «Қазақстанның агроөндірістік кешені – экономиканың жаңа драйвері» атты дөңгелек үстел болып өтті деп хабарлайды Qamshy.kz ақпарат агенттігі.

Пікірталасқа қатысушылар Қазақстанның ауылшаруашылық саласының даму мәселелерін, нақтылап айтқанда, Мемлекет басшысының «Қазақстанның үшінші жаңғыруы: жаһандық бәсекеге қабілеттілік» атты Жолдауында айтылған тапсырмаларды жүзеге асыру жолдарын саралады: отандық ауылшаруашылық өнімдерінің экспорттық әлеуетінің дамуы, ауылшаруашылық кооперациясына шағын және орта шаруашылықтарды барынша тарту, су ресурстарын тиімді пайдалану мен АӨК сауда-логистикалық инфрақұрылымын дамыту секілді өзекті мәселелерді қарастырмақ.

– Еліміздің агроөндірістік кешені экономиканың жаңа драйверіне айналуы керек. Қазақстан ауыл шаруашылығында үлкен әлеуетке ие. Ауыл шаруашылығы – мемлекет экономикасының негізгі бағыттарының бірі және бізде экологиялық таза өнімдерді экспорттау арқылы әлемдік азық-түлік нарығында өз орнымызды алу үшін барлық жағдай бар, – деді өз баяндамасында ӘЭСИ директоры Ержан Салтыбаев.

Е.Салтыбаевтың сөзінше, соңғы жылдары әлемнің мұнай, газ және металл нарығында үлкен құбылмалылық байқалуда. ЖІӨ едәуір бөлігін құрайтын Қазақстанның тау-кен өнідірісі саласы шикізат ресурстарына деген бағаның әлемдік конъюнктурасына байланысты. Мықты АӨК Қазақстан экономикасының дамуында тұрақтылықты сақтауға көмектеседі.

Сонымен қатар, дөңгелек үстел аясында 2017-2021 жылдарға арналған АӨК дамуының жаңа Мемлекеттік бағдарламасын жүзеге асу барысы да талқыланды.

Пікірталасқа қатысқандар: Қайрат Айтуғанов – ҚР ауылшаруашылығы вице-министрі; Евгений Ган – Қазақстан астық өңдеушілер Одағының президенті; Дамир Егізбаев – «Ұлттық аграрлық ғылыми орталық» Басқарма төрағасының орынбасары; Ажар Қажыбекова – ҚР Ауылшаруашылық министрлігі Егін шаруашылығы департаментінің директоры; Лилия Мусина – «ҚазАгро» ҰБХ» АҚ Басқарма төрағасының кеңесшісі; Арнұр Мұхамеджанов – ҚР Ауылшаруашылық министрлігі стратегиялар жоспарлау және сараптама департаментінің директоры; Думан Оспанов – «Ауылшаруашылығын қаржылай қолдау қоры» АҚ Басқарма төрағасының орынбасары; Михаил Мироненко – ҚР Тұңғыш Президенті – Елбасы Кітапханасының стратегиялық зерттеулер мен болжау қызметінің жетекшісі және т.б.