Сенбі күні Орал шаһарындағы Тәуелсіздік алаңында "Дәстүр" атты  мәдени- көпшілік шара өтті. ҚР Президенті Нұрсұлтан Назарбаевтың "Болашаққа бағдар: рухани жаңғыру" атты мақаласында "Ықылым заманнан арқауы үзілмеген ұлттық салт-дәстүрімізді  алдағы өркендеудің  берік  діңі етіп алып,  болашаққа сеніммен бет алып, алға  нық қадам басу" қажеттігі  туралы айтқан болатын. Осы жоба аясында   жас ұрпақтың санасына патриоттық сезім ұялатып, ұлттық салт-дәстүрімізді ұлықтау мақсатында ұйымдастырылған шараға  халық көп жиналды. Мәдени шараға облыс әкімінің бірінші орынбасары Арман Өтеғұлов арнайы келді.

• Бүгінгі шара - Елбасымыздың "Рухани жаңғыру: болашаққа бағдар" бағдарламасының аясында өтіп жатқан этностық  шаралардың бірі. Ата-бабамыздан мұра болған игі дәстүрімізді жастардың санасына сіңіруді мақсат тұтады. Өсіп келе жатқан жас ұрпақ ұлттық құндылықтарымыз бен салт-дәстүрімізді  заман талабына сай қолданып, ұрпақтан-ұрпаққа жеткізсе дейміз, -деп сөзін сабақтаған Арман Кәрімұлы ұлттық құндылықтарымызды насихаттайтын мұндай  мерекенің алдағы уақытта да тұрақты түрде өтіп тұратынына сенім білдірді.

            Ән мен жыр төгіліп, ұлттық салт-дәстүріміз көрініс тапқан шарада өңіріміздің орта, жоғары оқу орындарының студенттері мен оқытушылары белсенділік танытты. Тәуелсіздік  алаңында әр аудан мен Орал қаласының тұрғындары  ақ шаңқан киіз үй тігіп, ұлттық салт-дәстүр бойынша көрініс көрсетіп, келген қонақтарға қазақтың әдет-ғұрыпмен қонақжайлылық  танытты.  Мерекеде   ұлттық қолөнер көрмесі ұйымдастырылып, ұлттық ойындар ойналды. Қадыр Мырза Әли ескерткішінің маңында Ақ Жайықтың ақ шағаласы атанған Ақұштап Бақтыгереева бастаған  өңіріміздің ақын-жазушылары жастармен жүздесіп, тағылымды  әңгімелер айтты.

            Ұлттық әдет-ғұрып, салт-дәстүрімізді жұртшылық назарына ұсынған жарасты  шара қалалық, облыстық өнер ұжымдарының концертіне ұласты.

Гүлжамал   ЖОЛДЫҒАЛИ