11 қазан күні Байқоңыр айлағынан ұшырылған "Союз" ғарыш кемесінен ақау шықты деп хабарлайды Qamshy.kz ақпарат агенттігі.  "Роскосмостың" мәліметіне сүйенсек, кемеде төтенше жағдай орын алған.

Байқоңырда зымыран ұшыру кезінде апат болған "Союз МС-10" зымыран-тасығышының экипажын іздеу мақсатында Жезқазған, Байқоңыр және Қарағанды аэродромдарынан Ми-8 тікұшақтары ұшып шықты.

Ресейлік ria.ru сайтының дерегіне сүйенсек, ғарыш кемесі ұшырылған соң зымыран тасығыштың двигателінен ақау шығыпты. Экипаж отырған капсула одан ажырап, "баллистикалық төмен бағыт алу режимімен" Жерге қайта бет алған. Ал экипаж Жезқазғаннан 25 шақырым жерге қонып, 15 минуттан соң оларға құтқарушылар мен дәрігерлер жеткен. Экипаж мүшелері аман, ешқандай жарақат алмаған. Экипаж қонған аймаққа "Роскосмостың" бас директоры Дмитрий Рогозин де ұшып кеткен.

“Кеме экипажындағы адамдар тірі әрі байланысқа шықты. Құтқарушылар Алексей Овчинин мен Ник Хейгті іздеп, эвакуациялау үшін бара жатыр” деп мәлімдеме жасады.