Бүгін, 23 маусымда парламент мәжілісінің экс-депутаты, мемлекет қайраткері Қуаныш Махмұтұлы Алпысбеков 77 жасқа қараған шағында қайтыс болды. Бұл туралы парламент мәжілісінің баспасөз қызметі хабарлады.

Мәжіліс төрағасы Нұрлан Нығматулин марқұмның отбасы мен жақындарына көңіл айтты.

– Мәжіліс депутаттарының атынан және жеке өз атымнан орны толмас қазаға байланысты марқұмның отбасына, туған-туыстарына және жақындарына көңіл айтамын. II сайланған парламент мәжілісінің депутаты ретінде Қуаныш Махмұтұлы Алпысбеков отандық заңнамалық базаны жетілдіруге сүбелі үлес қосты, – деді мәжіліс спикері.

Сонымен қатар Нұрлан Нығматулин Қуаныш Алпысбековтің КОКП ОК-де, кейінірек көлік министрлігінде, Ақмола облысының басшылығында, сондай-ақ премьер-министрдің кеңсесінде жауапты мемлекеттік лауазымдарда жұмыс істеген жылдардағы жоғары кәсібилігіне тоқталды.

– Көрнекті мемлекет қайраткері, керемет тұлға және сенімді дос Қуаныш Махмұтұлы туралы жарқын естелік адамдардың жүрегінде мәңгі сақталады, – деді ол.