Премьер-министрдің бірінші орынбасары Роман Скляр өз қызметіне қоса Ұлттық инвестициялық орталықты басқаратын болады. Бұл туралы премьер-министрдің қаулысында жазылған.

"Инвестициялық қызмет жөніндегі Ұлттық Орталық құрылсын. Ұлттық орталық өз қызметін Үкімет аппаратының индустриялық және инфрақұрылымдық даму бөлімінің құрылымы негізінде жүзеге асырады. Премьер-министрдің бірінші орынбасары Роман Скляр өз қызметіне қоса Ұлттық инвестициялық орталықты басқаратын болады", — делінген қаулыда.

Роман Склярға жаңа мемлекеттік құрылымның басшысы ретінде жүктелген міндеттер:

• ИҚҰО жұмысын ұйымдастыру және ИҚҰО жұмысына мемлекеттік органдар мен квазимемлекеттік ұйымдардың өкілдерін тарту;
• ИҚҰО-ға жіберілген жұмыскерлердің міндеттері мен функционалдық міндеттерін айқындап, қажет болған жағдайда мемлекеттік органдар мен квазимемлекеттік ұйымдардың басшыларына жұмыскерлерді ауыстыру жөнінде ұсыныстар енгізу;
• мемлекеттік органдар мен квазимемлекеттік ұйымдар басшыларының атына ИҚҰО-ға жіберілген жұмыскерлерді көтермелеу немесе жазалау туралы ұсыныстар енгізу;
• Премьер-Министрдің бірінші орынбасарын ИҚҰО жұмысының туралы тоқсанына бір реттен хабардар етіп тұру;
• ИҚҰО жұмыс топтарын құру.