Шымкентте 21 жастағы студент Нұрай Серікбай пышақ жарақатынан қаза тапты. Полиция күдікті ретінде 29 жастағы Шерхан Аймаханды іздеп жатыр, оның фотосын жергілікті БАҚ жариялады.

Не белгілі

Қайғылы жағдай 11 қаңтар кешінде Төлеметов пен Өтегенов көшелерінің қиылысында болды.

Бейнебақылау кадрларында қыздың қашуға ұмтылғаны, қарсылық көрсеткені, ал жігіттің ұрып, пышақпен бірнеше соққы жасағаны көрінеді. Оқиға орнынан ер адам қашып кеткен.

Марқұм жайлы

Нұрай ата-анасымен осы маңдағы көпқабатты үйде тұрған. Ол отбасындағы ең кенже болған, екі ағасы болған. Жақындары денесін моргтен алып, Түркістан облысының Төрткөл ауылына жеткізген. Жаназа 13 қаңтар күні атқарылмақ.

Күдіктіні іздеу

Полиция іздеуге 29 жастағы Шерхан Аймаханды жариялаған. Тергеу күдіктінің оқиға орнынан HYUNDAI Mufasa автокөлігімен кеткенін мәлімдеген (мемлекеттік нөмірі 015 AUY 17).

Куә болған тұрғындардан және бейнетіркегіш жазбасы бар жүргізушілерден 102 нөміріне хабарласуды, қолдағы мәліметті құқық қорғау органдарына беруді сұраған. Қылмыстық іс Қылмыстық кодекстің «Кісі өлтіру» бабы бойынша қозғалған. Шабуылдың себебі әзірге белгісіз.

Күдіктінің және марқұмның фотоларын жергілікті OTYRAR порталы жариялағанын бұған дейін БАҚ хабарлаған.

Бұл туралы Qamshy.kz ақпарат агенттігі хабарлайды.