Кеше Мемлекет басшысы Нұрсұлтан Назарбаев Солтүстік Қазақстан облысына жұмыс сапарын жасады. Теріскейге ат басын бұрған Президент өңірдегі бірқатар нысандарды аралап, тауар өндірушілермен кездесті, - деп жазады Qamshy.kz aikyn.kz - ке сілтеме жасап.
Президент Нұрсұлтан Назарбаев ал­дымен осындағы халықаралық әуе­жайды аралап көрді. Еліміздің солтүсті­гіндегі халықаралық ірі әуе айлағы 2400 шаршы метр аумаққа ор­наласқан, саға­тына 200 жолаушыны өткізуге мүмкіндігі бар. Елбасы әуежайдағы жолау­шылар тер­миналы мен қайта өңдеуден өткен ұшу-қону жолағымен танысты. Мамандар Мемлекет басшысына жолаушылар терми­налын, басқару жолақтары мен жарық­тандыру құралдарын жаңарту жұмыстары жөнінде, сондай-ақ алдағы уақытта әуе­жайды дамыту жобалары туралы баяндады. 
Халықаралық әуежайдан шыққаннан кейін Елбасы бірнеше әлеуметтік объектілерге кіріп шықты. Алдымен Президент  Нұрсұлтан Назарбаев «100 мектеп, 100 аурухана» бағ­дарламасы аясында салынған жаңа емханаға барды. Бұл жерде Елбасы медицина қызмет­керлеріне су жаңа «Шевролет» авто­кө­ліктерінің кілтін салтанатпен тапсырды. Одан кейін Президент Қызылжар оран­жереясына келді. Мұндай оранжерея  республикада жалғыз ғана. Қызылжар оранжереясын күрделі жөндеуден өткізіп, жаңартуға «Жол картасы» бағдарламасы аясында 300 миллион теңге бөлінген болатын. Бұл қаржының орнымен, игілікке жұмсалғаны көрініп тұр. Қазақстан Президентінің құрметіне ботаника бағына тағы бір қасиетті өсімдік құрма ағашы отырғызылды. Құр­маның ұрығын мұ­сылман қауы­мының қасиетті орталығы Мекке мен Мединадан арнайы алдыртқан екен. Қазiргi таңда бо­таникалық бақта эк­зотикалық өсiм­дiктiң 2 мыңнан астам түрi бар. Олар дұрыс өсу үшiн нысанның iшiндегi тем­пература +8 градустан төмен болмауы тиiс екен.
Мемлекет басшысының келесі бағыты «Бәйтерек» ықшамауданы болды. Жаңадан бойы көтерген бұл ықшамаудан «Нұрлы көш» бағдарламасы аясында жүзеге асы­рыл­ған. Қазіргі кезде ық­шамауданнан 75 отбасы пәтер алып, баспаналы болып жа­тыр. Жалпы ал­ғанда, «Бәйтерек» ықшамау­данында 140 көппәтерлі тұрғын үй тұр­ғы­зылады деп жоспар­ланған. Алдағы уақытта бұл жоспардың  орын­далары  сөзсіз.
Егін жинау кезінде дәнді дақылдар егетін өңірлерді аралауы – Президенттің дағдысына айналған. Нұрсұлтан Әбішұлы Назарбаев  осынау маңызды науқан кезінде  ең­беккер­лермен жиі жолығып, алтын дән­нің  төгіл­мей-шашылмай жиналуына ай­рық­ша кө­ңіл бөледі. Осы жолы да Ел­басы­ның жұ­мыс сапарындағы келесі беталыс Қы­зылжар ауданының егістік даласы бол­ды. Нұрсұлтан Назарбаевтың пікірінше, егер барлық технологияны сақ­тап, уақыт­тан қалмаса ең қуаңшылық де­ген жылдың өзінде орташа өнім алуға болады. 
Солтүстік Қазақстан облысы тек ас­тықты  өлке ғана емес, ірі кәсіпорындар шоғырланған өңір. Мұндағы машина жасау саласы қарқынды  дамып келеді.  Әсіресе, қорғаныс саласына қажет техникалар шы­ғаратын танымал зауыттар мұнда. Өңірге барған Елбасы әскери өнеркәсіп көрмесіне де ат басын бұрды. Мемлекет басшысы көрмеде Солтүстік Қазақстан облысындағы кәсіп­орындар шығарған әскери техникамен танысты. Қазақстан Президентіне отандық қорғаныс өнер­кәсібінің өндірістік мүм­кіндігі мен жоғары инновациялық әлеуеті көрсетілді. Көрмені аралап шыққан соң Нұрсұлтан Назарбаев «С.Киров атын­дағы зауыт» АҚ, «Пе­тропавл ауыр машина жасау зауыты» АҚ және «ЗИКСТО» АҚ әскери-өндіріс кәсіп­орындарының инже­нер­лері­мен және конструкторларымен әң­гімелесті.  
Әскери техника құрастырумен қатар электрлік белгі беру жабдықтарын, аза­маттық және арнайы мақсаттағы радио­стансаларды, мұнай-газ секторы мен энер­ге­тика кешені кәсіпорындары үшін өнеркәсіп құрылғы­ларын, вагондар (ашық ва­гон­дар, астық таситын вагондар, платфор­малар) және  көлік саласы үшін басқа да өнім түрлерін шығару мен жаңарту аталған кәсіпорындардың негізгі қызметі болып саналады. Демек, елдің  бәсеке­лестікке қабілетті болуына  мұн­дағы  өнеркәсіптердің қосар үлесі мол.
Бұдан соң, Елбасы Спорт сарайында жеңіл атлетика манежін, мұз айдынын және оқу-жаттығу базасын аралап көрді. Сондай-ақ көркем гимнастика өнері көр­сетілімін, жеңіл атлетика мен хоккей жат­тығуларын тамашалады. Артынша Сол­түстік Қазақстан облысы жұрт­шылығы өкіл­дерімен кездесті. Кездесуге кәсіп­кер­лер, әлеуметтік сала қыз­меткерлері, арда­герлер, жастар бел­сенділері, қоғамдық ұйымдар мен этномәдени бірлестіктердің жетекшілері қатысты. Мемлекет басшысы әңгіме барысында Солтүстік Қазақстанның республика бойынша барлық астық кө­лемінің үштен бірін өсіретін жетекші аг­рарлық-индустриялық өңір екенін атап өтті. Сондай-ақ Қазақстанның бәсекеге қабілеттілігін арттырудағы облыстың үле­сі­не назар аударды. Қазақстан Президенті тәуелсіздік жылдары көп нәрсеге қол жеткізілгенін, бірақ әрбір қазақстандық отбасының тұрмысын түзеп, әл-ауқатын жақсарту үшін әлі де көп шаруа тындыру қажеттігін айтты. Кездесу соңында Нұрсұлтан Назарбаев жинал­ғандарға зор денсаулық пен бақ-береке тіледі.
Солтүстік Қазақстан облысының жері құнарлы, жайылымы шұрайлы. Ал жер астындағы пайдалы қазбалар қаншама! Облыс аумағындағы пайдалы қазбалардың көптеген түрлерi анықталып, 286 кен орны белгіленген. Солардың iшiнде 34 — ме­тал­дық, 2 — металдық емес, 217 — құрылыстық және технологиялық шикiзат бар екен, 33 — жер асты сулары, оның 6-ауы мине­ралды сулар болып шықты. Облыс аумағы Солтүстiк Қазақстан уран кендi, алмасты және қалайы-сирек металды аймағының бөлiгi болып табылады. Онда минералды шикiзаттың қомақты қоры анықталды, олар Қазақстан Республикасы теңгерiмiнде мынаны құрайды: қалайы бойынша — 65%, цирконий — 36,6%, уран — 19%, титан-5%, вольфрам — 1,1%. Минералды шикiзат базасын кеңейту перспективасы бар, әсi­ресе облыстың оңтүстiк-батысында. Мұнда алтын, күмiс, техникалық және зергерлiк алмас, қалайы, титан, түстi және сирек ме­талдар, қоңыр көмiрдiң бiрқатар маңызды кенорындары бар. 2014 жылғы желтоқсан­-да алтын өндiретін Әулие алтын кен ор­нында  «Аулие Голд Майнинг» ЖШС кә­сiпорны iске қосылды. Уәлихан ауданын­да фас­форит-глаукониттi құмдарды өнер­кә­сiптiк бағалау мақ­сатында геологиялық барлау жұмысы жүргiзiлуде. Обухов ти­танцир­коний кенi, Сырымбет қалайы кен орын­дарын өнеркәсiптiк әзiрлеу жүр­гiзiлiп жа­тыр. Бір сөзбен айтқанда, өңірдегі осынау табыстар тұтас елдің дамуына  қо­сылып жатқан үлес екені анық. 
Ал  Президенттің  аймаққа жұмыс са­парымен баруы  облыс  еңбеккерлерінің алдағы күнге сенімін арттырып, еңбектің еселене түсуіне ықпал етері анық.