Қазақстанда 2011 жылдың басынан бері 64 экстремистік акцияның жолы ерте кезеңде кесілді.
Бұл туралы кеше Астанада өткен терроризмнің алдын алу мәселелері бойынша дөңгелек үстелде мәлім болды. Отырыс жұмысына Мәжіліс төрағасы Н.Нығматулин, Сенат пен Мәжіліс депутаттары, Дін істері және азаматтық қоғам министрі Н.Ермекбаев, ҰҚК басшылығы, сондай-ақ үкіметтік емес ұйымдар өкілдері, қоғамдық және діни қайраткерлер, саясаттанушылар мен сарапшылар қатысты, - деп жазады Qamshy.kz aikyn.kz - ке сілтеме жасап.
Жиында сөз сөйлеген Мәжіліс төрағасы Нұрлан Нығматулин еліміздің қауіпсіздігі мен халқымыздың бейбіт өмірі – біздің баға жетпес байлығымыз екендігін еске салды. 
– Оны сақтау, одан әрі дамытуға үлес қосу – бәріміздің абыройлы міндетіміз. Елбасымыз тәуелсіздік алған күннен бас­тап, қауіпсіздік мәселесіне ерекше назар аударып келеді. Бүгінде осы бағытта елі­мізде көптеген жұмыстар атқарылды. Бірақ терроризм мен экстремизм жыл сайын үдеп барады. Бұл тек Қазақстандағы ғана емес, бүкіл әлемдегі проблема. Сондықтан тер­роризм мен экстремизмге қарсы күресті кү­шейту мақсатында Қазақ­стан Көшбас­шысы нақты тапсырмалар беріп, оларды орындау жолдарын көрсетті. Ең бастысы, бұл мәселеге бүкіл қоғам қа­тысып, шынайы қолдау білдіруде.
Нұрлан Зайроллаұлы әлемдегі лаңкестік оқиғалар терроризмнің ұлты, діні, шека­расы жоқ екендігін және бүкіл өркениет атаулыға қатер болып саналатынын атап көрсетті.
Президенттің биылғы маусымдағы Қауіп­сіздік кеңесі отырысында берген тапсырмасына сәйкес, Үкімет арнайы заң жобасын әзірлеп, Парламентке енгізгенін хабарлады.
Бұл құжат 5 кодекс пен 19 заңға өз­ге­ріс­тер енгізеді. Осы орайда Мәжіліс төра­ғасы қоғам өкілдерін бұл жобаны жетілдіре тү­суге атсалысуға және барлық ой-ұсыныс­тарды ортаға салуға шақырды.
Сенат төрағасының орынбасары Бек­тас Бекназаров экстремизмге және тер­роризмге күресті «Қазақстандағы маңызы жөнінен бірінші кезектегі мәселе» деп ба­ғалады.
– Бұл мәселедегі біздің басты міндетіміз – діни экстремизм көріністерінің алдын алу және терроризм қатерінің жолын кесу ар­қы­лы адамның, мемлекеттің және қоғам­ның қауіпсіздігін қамтамасыз ету. Еліміз экстремистік идеологиялар мен терроризм­ге байланысты діндер мен оларға қарсы күш­тердің арасындағы диалогтың нығаюы үшін күш-жігерді жалғастырып келеді. Ха­лықаралық терроризм мен экстремизм қатерінің кеңеюі заңнамалар­дың сапасына да жоғары талап қояды және терроризмге, оның көріністеріне қарсы күрес жөніндегі қолданыстағы құқықтық жүйені тұрақты түрде жетілдіріп отыруға мәжбүр етеді, – деді ол. 
Вице-спикер таяуда ғана қолданыстағы заңнамаға өзгерістер мен толықтырулар енгізілгенін жеткізді: терроризмге қарсы операцияларды жүргізу белгіленді; қар­жылық мониторинг субъектілерінің тізімі кеңейді; ішкі бақылау қағидаларын өткізу тетіктері жетілдірілді; террористік және экстремистік қызметті қаржыландырғаны және терроризм мен экстремизмге өзге де көмек көрсеткені үшін қылмыстық жаза енгізілді. Енді экстремизмге және тер­ро­ризмге қарсы іс-қимыл, қару-жарақ айна­лымы, көші-қон мәселелерін реттеу сала­ларындағы қолданыстағы заңнаманы одан әрі жетілдіруге бағытталған «Кейбір заңна­малық актілерге экстремизмге және терро­ризмге қарсы іс-қимыл мәселелері бойын­ша өзгерістер мен толықтырулар енгізу ту­ралы» заң жобасы Парламенттің қа­рауында жатыр.
Мәжілістің Халықаралық істер, қор­ға­ныс және қауіпсіздік комитетінің төрағасы М.Әшімбаев та заңнамалық базаны жетіл­дірумен бірге, әсіресе, экстре­мизм мен тер­роризмнің алдын алу және жолын кесу са­ласында меморгандар мен үкіметтік емес ұйымдардың және қазақ­стандықтардың арасындағы өзара іс-қимылды күшейту маңызды екеніне тоқталды. 
Ал Ұлттық қауіпсіздік комитеті төра­ғасының орынбасары Н.Білісбеков бол­са, 5 жылда 559 қазақстандық рекруттың тер­рористік белсенділік ошақтарына шығуына жол берілмегендігін хабарлады.
– Бүгінде қарулы қақтығыстар ай­мақ­тарынан содырлардың Отанына оралуы салмақты қауіп тудырып отыр. Олардың көпшілігі ары қарай да шектен тыс ради­калды көзқарасты ұстануда, арнайы дағдыға және ұрыс салу тәжірибесіне ие. Сол себепті де, олардың елімізде де те­рактілер жасау қаупі жоғары деп бағалануда. Өз кезегінде қарулы қақтығыстар айма­ғында қалған тұлғалар радикализмді идеялық тұрғыда насихаттаушы рөлін атқарады. Олар рек­руттар мен содырларды лаңкестік қызметке тарту және итермелеу жұмыстарына бел­сенді атсалысуда, – деді Нұрғали Білісбеков.  
Осы жылдары жойылған радикалды топтардың бір бөлігі халықаралық тер­рорлық ұйымдардың тікелей басшы­лы­ғы­мен қимылдаған көрінеді. Басқа топтар ақпараттық насихат ықпалымен радикал­данып, белсенді әрекеттерге көшуге ты­рысқан. Осыған байланысты ҰҚК байла­мынша, интернеттегі радикалды идео­логияның таралуы елеулі проблемаға айналып отыр. ҰҚК мәліметінше, ай сайын ға­лам­торда терроризм туралы 70 мың материал жарияланады. Мұның барлығы «мемлекет­тен бірінші кезекте, заңнамалық деңгей­де алдын алушы шешімдерді түзуді талап етеді».
ҰҚК төрағасының орынбасары 2011 жылдан бері Қазақстанда 64, ал жыл басы­нан бері 9 экстремистік акцияның жолы кесілгенін мәлімдеді.
– Олай болмағанда, осы жылдың жа­зында Алматы мен Ақтөбеде орын алған қайғылы жайттар саны бұдан да көп болар еді. Қарапайым халық көп жиналатын орындарға, сонымен бірге, құқық қорғау органдары мен арнаулы мемлекеттік ор­гандардың нысандарына және қызмет­керлеріне лаңкестік шабуыл жасалуына жол берілген жоқ. Ауғанстанда, Сирия мен Иракта қарулы қақтығыстар басталғалы бері халықаралық лаңкестік ұйымдардың лагерлерінен, үшінші елдердегі тірек және транзиттік инфрақұрылымдардан Қа­зақ­станның 45 азаматы қайтарылды. 559 қа­зақстандық терактілерге қатысу үшін шетел­ге шыға алмай қалды. Барлық қайт­қандар арасынан лаңкестік әрекеттерге қатысқаны үшін 33 адам қылмыстық жауап­кершілікке тартылды. 5 жылда тер­рористік және діни сипаттағы қылмыстар жасағаны үшін 445 адам сотталды. Осы жылдың басынан бері 25 адам сотталса, шамамен 50 адам тергеу оқшаулағышында отыр, – деп түйді Н.Білісбеков.