Гаражда тұрған көліктен ер адам мен жас қыздың мәйіті табылды, деп хабарлайды Qamshy.kz ақпарат агенттігі өңірлік ішкі істер департаментінің баспасөз қызметінің дерегін негізге ала отырып.
3 сәуірде Көкшетау қаласы ішкі істер басқармасының жедел басқару орталығының арнайы желісіне сағат 21:13-те әйел қоңырау шалып, үйдің ауласындағы металл гараждың ішінде тұрған көліктен 34 жастағы күйеуі мен бейтаныс қыздың мәйітін тауып алғанын хабарлайды.
Оқиға орнына жеткен жедел-тергеу тобы 1992 жылы туған қыздың кім екенін анықтаған. Зорлық-зомбылық белгілері жоқ екі адамның денесі мәйітханаға жіберіліп, сараптамалар белгіленді.
Полицияның хабарлауынша, олар газдан уланып өлуі мүмкін.
